काठमाडौं । नेकपा प्रचण्ड–नेपाल पक्षकी नेतृ रामकुमारी झाँक्रीले प्रहरी समक्ष गिरफ्तारी दिएकी छिन् । झाँक्रीको माग बमोजिम प्रहरीले रँयविरुद्धको अभियोगको पूर्जी थमाएपछि झाँक्रीले गिरफ्तारी दिएकी हुन् । नेतृ झाँक्रीले आफ्नो बिबाहको ११ औ वर्षगाँठ मनाईरहेकाबेला उनलाई पक्राउ गर्न प्रहरी झाँक्री निवास पुगेको थियो ।
राष्ट्रपति विद्यादेवी भण्डारीबारे दिएको अभिव्यक्तिलाई लिएर प्रहरीले झाँक्रीलाई पक्राउ गरेको हो । यस अघि गृहमन्त्रीलाई ज्ञापनपत्र बुझाउँदै ओली पक्षका अखिल नेपाल महिलासंघका नेतृहरुले झाँक्रीलाई पक्राउ गर्न दावाव दिएका थिए ।
गिरफ्तारी दिनु अघि प्रहरीले झाँक्रीलाई सोधपुछका लागि बोलाएको भएपनि झाँक्रीले पक्राउ पूर्जीविना जान अस्वीकार गरेकी थिइन् । प्रहरीले राज्यविरुद्धको कसूरमा अनुसन्धान गर्न भनी झाँक्रीलाई पक्राउ पूर्जी पनि दिएपछि उनले गिरफ्तारी दिएकी हुन् । प्रहरी झाँक्रीलाई पक्राउ गर्न घर पुग्दा झाँक्रीले बिबाहको ११ औ वर्षगाँठको तयारी गर्दै थिईन् ।
गोरखामा आयोजित एक कार्यक्रममा राष्ट्रपतिबारे गरेको टिप्पणीलाई लिएर नेकपा ओली समूहसम्बद्ध अनेमसंघले रामकुमारीलाई कारबाही गर्न माग गरेको थियो ।
झाँक्रीलाई पक्राउ गर्न महाशाखाका डीएसपी दुर्गाराज रेग्मीको नेतृत्वमा दर्जन बढी प्रहरी अधिकारीहरु उनको निवासमा पुगेका थिए ।
झाँक्रीको पक्राउको विरोधमा उनको निवासबाहिर नेकपा प्रचण्ड-नेपाल पक्षका धेरै कार्यकर्ता भेला भएका थिए । पक्राउ पर्नुअघि उनले घर अगाडी भेला भएका समर्थकहरुलाई सम्बोधन गर्दै आफू राज्यको कानुनको पालक भएकाले गिरफ्तारी दिएको बताएकी थिइन् ।
प्रतिक्रिया