संसद पुनर्स्थापना भयो भने कुनै दलको बहुमत पुग्दैन, फेरि अस्थिरता, सांसद किनबेचको सृङ्खला सुरु हुनेछ : प्रधानमन्त्री ओली

बुटवल । प्रधानमन्त्री केपी शर्माओलीले ६४ प्रतिशत सांसदहरुको समर्थन रहेको प्रधानमन्त्रीले गरेको संसद विघटन असंबैधानिक हुन नसक्ने बताएका छन् ।

नेकपाको ओली पक्षले आज बुटवलमा आयोजना गरेको प्रदेश स्तरको जनसभालाई सम्बोधन गर्दै संसद चल्नसक्ने अवस्था नभएपछि र अर्को सरकार पनि बन्न सक्ने अवस्था नभएपछि आफुले संसद विघटन गर्नु परेको बताए ।

उनले बहुमत प्रधानमन्त्रीको हैसियतले संसद विघटन गरेको बताउंदै काम गर्न नदिने, अस्थिरता तर्फ लैजाने पार्टी भित्रै असहयोग भएकाले संबिधान सम्मतरुपमा संसद विघटन गरेको दाबी गरे ।

उनले संसद पुनस्र्थाना भएको अवस्थामा कुनै दलको बहुमत नपुग्ने र पुन अस्थिरता, सांसद किनबेच र संसदीय ब्यवस्था नै बदनाम हुने अवस्था आउने चतावनी दिंदै जनताले पुनः स्थिर सरकार दिएर विकासको बाटो खोल्नु पर्ने बताए । प्रधानमन्त्री ओलीले अस्थिरता आउने गरि अदालतले फैसला नगर्ने बिश्वास ब्यक्त गरे ।

३ दिन अगाडी देशभरीबाट जम्मा भएका केहि मान्छे देखाउंदै आफुलाई मान्छे हेर्न बोलाएको प्रशंग कोटेयाउँदै प्रधानमन्त्री ओलीले लुम्बिनी प्रदेशको जनता र जनसहभागिता हेर्न आउन प्रचण्ड-नेपाल पक्षलाई उनले आग्रह गरे । उनले बुटवलको उपस्थितीलाई अस्थिरताका विरुद्ध दिएको जवाफको संज्ञा दिए ।

प्रचण्ड-नेपाल पक्षलाई कटाक्ष गर्दै ओलीले पार्टी बनाउन नचाहने, आन्दोलनको रक्षा गर्न नचाहने र विकास हेर्न नचाहने केहि तत्व पार्टीबाट बाहिरिएको भन्दै उनीहरु निस्केपछि रोकिएको पार्टी चलायमान भएको बताए । उनले केहि मान्छेहरुले पार्टी छाडेपछि पार्टी चलाएमान भएको बताए । ‘३ वर्ष देखि पार्टी हल न चल भएकोमा उनीहरुले पार्टी छाडेपछि पार्टी चलायमान भएका छन् । पार्टी भित्रै बसेर बिरोध गरिरहेकाहरु आज बाहिर गएर बिरोध गरिरहेका छन् । उनीहरुले पार्टी छाडेपछि पार्टीमा अनुसासीत भएको, बिचार मिलेको पार्टी र सुदृढ पार्टी बनेको छ । कठैबरा भन्नु पर्ने कोहिपनि बाहिर गएका छैनन् ।’ प्रधानमन्त्री ओलीले भने ।

‘संसद विघटन भनेको प्रतिगमन हो रे, जनताको बिचमा जानु भनेको प्रतिगमन हो रे । जनताको बीचमा जाने काम कसरी प्रतिगमन हुन्छ ?’ ओलीले प्रश्न गरे,  ‘बैशाखमा एक्कासी प्रधानमन्त्रीले राजिनामाको कुरा आयो, प्रधानमन्त्री हुन मनलागेर हुने कुरा हो ? ‘ जतिबेला देशको भुभाग समेटेर नक्सा बनाएकै बेला प्रधानमन्त्रीको राजिनामा मागेको ओलीले आरोप लगाए । ‘नक्सा प्रकाशित भएपछि उनीहरु आत्तीए त्यसैले राजिनामा मागियो ।’ प्रधानमन्त्री ओलीले भने ।

२८ गते काठमाडौमा प्रचण्ड-नेपाल पक्षले गरेको सभालाई ब्यङ्ग गर्दै ओलीले १७ जनालाई वक्ता बनाएर आफु विरुद्ध १७ गाली पुराण सुनाएको टिप्पणी गरे । ‌बैशाखकाे चुनावमा अन्य पार्टीकाे बाकस रित्ताे हुने र नेकपाकाे बाकस जनताकाे मतले भरिने ओलीले दाबी गरे ।