भारतमा कोरोना खोप लगाएका थप ३ जनाको मृत्यु

एजेन्सी । भारतको कोरोना भाइरस (कोभिड-१९) विरुद्धको खोप लगाएका थप ३ जनाको मृत्यु भएको छ । भारतको केन्द्रीय स्वास्थ्य मन्त्रालयलाई उद्धृत गर्दै भारतीय मिडियाले दिएको जानकारी अनुसार पछिल्लो पटक थप ३ जनाको मृत्यु भएको हो ।

मृत्यु हुनेहरु मध्य प्रदेश, राजस्थान र हरियाणा का ३५, ३८ र ५८ उमेरका हुन् । उनीहरुले करिब ८-९ दिन अगाडि कोरोना खोप लगाएका थिए ।

यसअघि भारतमा कोरोना खोप लगाएका २४ जनाले ज्यान गुमाएका थिए। यो सँगै कोरोनाविरुद्धको खोप लगाएपछि मृत्यु हुनेको संख्या २७ पुगेको छ ।

भारतको केन्द्रीय स्वास्थ्य मन्त्रालयले दिएको रिपोर्ट अनुसार २५ जनाको पोस्टमार्टम रिपोर्ट आइसकेको छ । उनीहरुको मृत्युको फरक–फरक कारण देखिएको छ । दुई जनाको रिपोर्ट आउन बाँकी छ ।

उनीहरुको मृत्यु हुनुको कारण खोप लगाउनु नभई अन्य रहेको भारतको केन्द्रीय स्वास्थ्य मन्त्रालयले जनाएको छ ।