काठमाडौं । केपी शर्मा ओली प्रधानमन्त्री भएको तीन वर्ष पुगेको छ । विकास र समृद्धिको नाराका साथ २०७४ मंसिरमा भएको आम निर्वाचनमा वामपन्थी गठबन्धनले विजय हासिल गरेपछि तत्कालिन नेकपा एमालेका अध्यक्ष केपी शर्मा ओली प्रधानमन्त्रीमा निर्वाचित भएका थिए आजैका दिन ।
तत्कालिन नेकपा माओवादी केन्द्रको समर्थनमा प्रधानमन्त्री भएका ओलीले यस तीन वर्षको बीचमा देशमा ‘अभूतपूर्व कायापल्ट’ भएको दाबी गरेका छन् । ओली र ओली समर्थकहरुले विकासै विकास मात्र भएको देखेका छन् । यति धेरै विकास र देशको समृद्धि अहिलेसम्म कोही प्रधानमन्त्रीले पनि नगरेको उनीहरुको दाबी छ ।
ओलीका विरोधी र आलोचकहरुले तीन वर्षमा थोरै काम र धेरै गफ भएको जिकिर गरिरहेका छन् । ओलीकै कारण तीन वर्षको उत्तरार्धमा संघीयता, गणतन्त्र र लोकतन्त्र धरापमा मात्र परेको छैन, ओलीले आफ्नै पार्टी, संघीय संसद र सिंगो देशलाई नै तहसनहस गरेर प्रतिगामी र स्वेच्छाचारी शासन सुरु गरेका छन् भन्ने आरोप विपक्षले लगाइरहेका छन् ।
तर, ओलीले आज आफुले तीन वर्षमा गरेको कामको फेहरिस्त सार्वजनिक गर्ने भएका छन् । हिजो मात्रै मुलधारका मिडियालाई दलाल भएको आरोप लगाएका ओली सरकारका उपप्रधानमन्त्री इश्वर पोखरेलले मिडियाले सही सूचना नदिएका कारण अब आफै लाइभ टेलिकास्टमार्फत सरकारका उपलब्धी सार्वजनिक गर्ने जनाएका थिए ।
आज ओलीले आफुले तीन वर्षमा गरेका मुख्यमुख्य कामको उपलब्धी सुनाउने तयारी गरेका छन् । पुनर्निर्मण भएको सिंहदरबारका तीन मोहडा र प्रधानमन्त्री एवं मन्त्रिपरिषदको कार्यालय उद्घाटन कार्यक्रममा ओलीले प्रेस ब्रिफिङमार्फत तीनवर्षे उपलब्धी सुनाउन लागेका हुन् ।
ओलीले बिहान ११ बजे सरकारका मुख्य उपलब्धीहरु सुनाउने तयारी रहेको उनका प्रेस सल्लाहकार सूर्य थापाले जनाएका छन् ।
प्रधानमन्त्री केपी शर्मा ओली २०७४ साल फागुन ३ गते प्रधानमन्त्रीमा निर्वाचित भएका थिए ।
प्रतिक्रिया