विराटनगर । प्रदेश १ का मुख्यमन्त्री शेरधन राईले दाहाल–नेपाल कम्पनीलाई मुलुकलाई अँध्यारो खाडलमा लैजान लागेको आरोप लगाएका छन् ।
विराटनगरमा ओली पक्षद्वारा आयोजित सभालाई सम्बोधन गर्दै मुख्यमन्त्री राईले पुष्पकमल दाहाल र माधवकुमार नेपालले खुमलटारमा कम्पनी दर्ता गरेर मुलुकलाई अँध्यारो खाडलमा लैजान लागेको आरोप लगाएका हुन् ।
राईले दाहाल–नेपाल कम्पनीले राष्ट्रपति, प्रधानमन्त्री, पार्टी अध्यक्ष र मुख्यमन्त्रीहरूलाई अपदस्त गरेर सत्ता कब्जा गर्ने तयारी गरेपछि प्रतिनिधिसभा विघटन गरिएको दाबी गरे । उनले भने, ‘राष्ट्रपति, प्रधानमन्त्री, पार्टी अध्यक्ष, मुख्यमन्त्रीहरूलाई अपदस्त गरेर एउटा कित्ताले सत्ता कब्जा गर्ने तयारी गरेको छ । यो कित्ताले देश अध्याँरो सुरुङभित्र लगेको छ ।’
राईले दाहाल नेपाल पक्षले प्रदेशमा भाँजो हाल्न लागेको भन्दै प्रदेश कब्जा गर्ने उनीहरुको चाहना पुरा गर्न नदिने दाबी गरे । उनले थपे, ‘विधि प्रक्रियाको खिल्ली उडाउँदै आउनुभएको छ । प्रदेश कब्जा गर्न दिँदैनौं । प्रदेशलाई संस्थागत गर्दै अगाडि बढ्छौं ।’ चुनावी प्रक्रियाबाट आएका मुख्यमन्त्रीहरूलाई हटाउन नसक्ने उनले बताए ।
मुख्यमन्त्री राई विरुद्ध प्रचण्ड नेपाल पक्षले अविश्वासको प्रस्ताव दर्ता गरेको छ । प्रदेश सभामा अविश्वास प्रस्ताव अघि बढाउन नदिन राई पक्षीले संसद अवरोध गरिरहेको छ । प्रस्ताव अघि बढे प्रदेशसभा नै विघटन गर्ने चेतावनी राईले दिइसकेका छन् ।
प्रतिक्रिया