प्रधानमन्त्री ओलीको जन्मदिनमा ससुरालीको सगुन र ऐला (रक्सी) !

काठमाडौं । प्रधानमन्त्री केपी शर्मा ओलीले मिश्रित शैलीमा मंगलबार आफ्नो ७० औँ जन्मदिन मनाएका छन्।

प्रधानमन्त्री निवास बालुवाटारमा भेला भएका प्रधानमन्त्री ओलीका घर र ससुराली तर्फका आफन्तहरुका बीच प्रधानमन्त्री ओलीले ७० औँ जन्मदिन मनाएका हुन्। प्रधानमन्त्री ओलीले आधा कर्मकाण्डीय धार्मिक शैलीमा र आधा नेवारी संस्कृतिका आधारमा जन्मदिन मनाएका छन् ।

जन्मदिनको अवसरमा प्रधानमन्त्री ओलीले सुरुमा ९१ वर्षीय बुवा मोहनप्रसाद ओलीसँग टीका लगाएर आर्शीवाद लिएका थिए भने त्यसपछि ससुराली तर्फबाट तयार गरिएको नेवारी परम्परा अनुसारको सगुन ग्रहण गरेर जन्मदिन मनाएका थिए ।

नेवार परिवारबाट राधीका शाक्यसँग विवाह गरेका ओलीका ससुरालीबाट नेवारी सगुन अण्डा, माछा, ऐला (रक्सी)लगायतको परिकार बालुवाटार पुगेको थियो ।

प्रधानमन्त्री ओलीको जन्म बाबु मोहनप्रसाद ओली र मधु ओलीको पुत्रको रूपमा वि सं २००८ साल फागुन ११ गते शनिबार तेह्रथुम जिल्लाको इवा गाउँमा भएको थियो।