काठमाडौं । ग्रेट हिमालयन क्रिकेट क्लब नेपाल-पाकिस्तान मैत्रिपूर्ण टी-२० क्रिकेट प्रतियोगिताको विजेता बनेको छ ।
काठमाडौंस्थित पाकिस्तानी दूतावासद्वारा आयोजित प्रतियोगिताको उपविजेता एन्जल क्रिकेट क्लब बनेको छ ।
काठमाडौंमा १० दिनसम्म चलेको प्रतियोगिताको अन्तिम दिन आइतबार युवा तथा खेलकुद सचिव केदार न्यौपानेले विजेता र उपविजेतालाई पुरस्कृत गरेका छन् ।
त्यसअवसरमा आयोजित पुरस्कार वितरण समारोहलाई सम्बोधन गर्दै सचिव न्यौपानेले पाकिस्तानी दूतावासले वार्षिक रुपमा आयोजना गर्ने क्रिकेट प्रतियोगिताले नेपाली क्रिकेट खेलाडीहरुलाई प्रोत्साहित गरेको बताए ।
न्यौपानेले खेलकुदको क्षेत्रमा पाकिस्तानी दूतावासले गरेका प्रयासहरूको सराहना गरे । खेलकुद आयोजनाले नेपाल र पाकिस्तान र नेपालबीचको दुईपक्षीय सम्बन्धलाई अझ मजबुद बनाउने उनले विश्वास व्यक्त गरे ।
नेपालका लागि पाकिस्तानी राजदूत सायद हैदर शाहले दुई देशका युवालाई खेलकुदमार्फत एकजुट गराउने प्रयास जारी रहेको बताए। राजदूत शाहले खेलकुद पाकिस्तान र नेपाली जनताबीचको सम्पर्कको महत्वपूर्ण आधारशिला भएको बताए ।
कार्यक्रममा नेपाली राष्ट्रिय क्रिकेट टोलीका कप्तान ज्ञानेन्द्र मल्ल पनि उपस्थित थिए । १० दिनसम्म चलेको प्रतियोगितामा १२ वटा क्रिकेट क्लबले भाग लिएका थिए ।
प्रतिक्रिया