लहान विस्फोटका गम्भीर घाइते भण्डारीलाई उपचारका लागि काठमाडौं ल्याइयो
काठमाडौं । सिरहाको लहानमा आइतबार दिउँसो भएको बम विस्फोटका घाइतेलाई थप उपचारका लागि काठमाडौं ल्याइएको छ ।
लहानस्थित मालपोत कार्यालयमा बम विस्फोट हुँदा धनगढीमाई नगरपालिका ४ का ३८ वर्षीय दिनेश भण्डारी गम्भीर घाइते भएका थिए । उनलाई नेपाली सेनाको हेलिकोप्टरबाट काठमाडौं ल्याइएको हो ।
सेनाको हेलिकोप्टर सैनिक मञ्च टुँडिखेलमा अवतरण गरेपछि घाइते भण्डारीलाई उपचारका लागि ट्रमा सेन्टरमा लगिएको छ । बमको छर्रा लागेर भण्डारीको तिघ्रामा चोट लागेको छ ।
मालपोत कार्यालयको माथिल्लो तल्लामा कुकर बम विस्फोट भएको थियो । विस्फोटमा भण्डारीबाहेक मालपोत कार्यालयका नायब सुब्बा शिवकुमार यादव, लेखापढी व्यवसायी धनगढीमाई नगरपालिका–१३ का भोलाबहादुर मगर घाइते भएका छन् । यसैगरी, गोलबजार नगरपालिका–६ का लक्ष्मी राना, बेचनी मगर, सिरहा नगरपालिका–१६ का लालबहादुर विश्वकर्मा, गोलबजारकी फूलकुमारी ठाकुर, भगवानपुर गाउँपालिकाका बद्रिनारायण यादव घाइते भएका छन् ।
प्रतिक्रिया