इतिहासले ओलीलाई कठोर कारवाही गर्नेछ : योगेश भट्टराई

काठमाडौं । नेकपा एमालेका सचिव एवं प्रचार विभाग प्रमुख योगेश भट्टराईले आफुहरुलाई कारवाही गरेर देखाउन अध्यक्ष ओलीलाई चुनौती दिएका छन् ।

ललितपुरको सानेपास्थित हेरिटेज गार्डेनमा मंगलबारआयोजित पत्रकार सम्मेलनमा सचिव भट्टराईलाई आफुहरु केपी ओलीको कारवाही भोग्न तयार रहेको तर उनलाई इतिहासले सबैभन्दा कठोर कारवाही गर्ने स्पष्ट पारेका हुन् ।

भोलि र पर्सि आयोजना हुन लागेको राष्ट्रिय कार्यकर्ता भेलाबारे जानकारी दिन आयोजित पत्रकार सम्मेलनमा भट्टराईले भने, हामीलाई बालुवाटारबाट कारवाहीको धम्की दिइएको छ । हामीहरु उहाँको कारवाही भोग्न लामबद्ध छौं । तर, इतिहासले तपाईंलाई सबैभन्दा कठोर कारवाही गर्नेछ । त्यो बेला तपाईंका निम्ति दुई थोपा आँशु झार्ने मान्छे पनि हुने छैनन् ।’

भट्टराईले धम्कीको भाषा नबोल्न ओलीलाई चेतावनी दिए । उनले ओलीलाई बरु राष्ट्रिय भेलाको प्रमुख अतिथि बन्न निम्ता दिए । उनले भने ‘तपाईं नै प्रमुख अतिथि भएर यो भेलाको उद्घाटन गर्नुहोस्, नजर लगाउनका लागि कसैलाई खटाउनै पर्दैन ।’

केही भन्नुछ भने देशभरबाट आएका कार्यकर्ता र केन्द्रीय सदस्यहरुलाई भन्न पनि उनले सुझाव दिए ।

पत्रकारहरुले सोधको प्रश्नको जवाफ दिँदै स्थायी कमिटी सदस्य सुरेन्द्र पाण्डेले विधान विपरित गुट भेला गरेर विभिन्न निर्णय गरेको भन्दै अध्यक्ष ओलीले नै कारबाहीको भागीदार भएको जिकिर गरे ।
‘पार्टी विधान विपरीत काम गर्ने अध्यक्ष मुक्त हुने अरु कारबाहीको भागीदार हुन्छन् भन्ने हुँदैन’ उनले भने ।

पाण्डेले पार्टी विभाजनको गतिविधि ओलीले सुरु गरेको बताउँदै भने, ‘संसदको विघटन गरिसकेपछि त्यसबेला नेकपा एमालेको नयाँ कमिटी भनेर कमिटी बनाउन आरम्भ गरेको उहाँले नै हो । विभाजनको प्रारम्भ उहाँले गर्नुभयो ।’

पत्रकार सम्मेलनमा विष्णु रिजालले प्रेस विज्ञप्ति वाचन गरेका थिए ।