काठमाडौं । विभिन्न जिल्लाको भ्रमण सकेर आइतबार काठमाडौं आइपुगेका नेत्र विक्रम चन्द ‘विप्लव’ले सोमबार प्रधानमन्त्री केपी शर्मा ओलीसँग भेटवार्ता गरेका छन् ।
प्रधानमन्त्री ओलीलाई भेट्न विप्लव सोमबार बालुवाटार नै पुगेका हुन् । भेटमा विप्लवले सरकारसँग भएको सहमति पूर्ण रुपमा कार्यन्वयन गर्न आग्रह गरेको विप्लवसँगै बालुवाटार पुगेका एक नेताले जानकारी दिए ।
विप्लवले रिहा नभएका आफ्ना पार्टीका नेता कार्यकर्तालाई तत्काल रिहा गर्न आग्रह गरेको ती नेताले बताए । विप्लव समूह र सरकारबीच गत फागुन २० गते भएको सहमतिमा नेपाल कम्युनिस्ट पार्टीमाथि लगाएको प्रतिबन्ध हटाउने, कारागारमा रहेका विप्लव समूहका नेता र कार्यकर्ता रिहा गर्ने र सम्पूर्ण मुद्दा खारेज गर्ने भनिएको थियो । तर, विप्लव समूहका केही नेताहरु जेलबाट छुटे पनि अधिकांश छुटेका छैनन् ।
विप्लवको उक्त आग्रहमा प्रधानमन्त्री ओलीले कानूनी प्रक्रिया जारी रहेकोले केही समय लाग्ने जवाफ दिएको ती नेताले जानकारी दिए ।
प्रतिक्रिया