काठमाडौं । सर्दै गरेको पार्टी कार्यालय भवन हेर्न प्रधानमन्त्री एवं नेकपा एमालेका अध्यक्ष केपी शर्मा ओली थापाथली पुगेका छन् ।
थापाथलीको उमंगहाइटस्थित उमंगमार्गमा रहेको सञ्जय अग्रवाल नामका व्यापारीको घरमा आगामी बैशाख १ गतेदेखि एमालेको केन्द्रीय कार्यालय सर्दैछ । यसका लागि एमालेले घरधनीसँग ५ वर्षको घरभाडा सम्झौता गरेको छ ।
केहीबेर निरीक्षण गरेका प्रधानमन्त्रीले कार्यालय भवन राम्रो रहेको बताएको कृषि तथा पशुपंक्षीमन्त्री पद्मा अर्यालले बताइन ।
सो घर प्रधानमन्त्रीका आर्थिक सल्लाहकार मोतीलाल दुगडले खोजेका हुन् । दुगडले घरधनीसँग पाँच वर्षका लागि सम्झौताभएको बताए ।
यसअघि सो घरमा संयुक्त राष्ट्रसंघ युएन वुमनको कार्यालय थियो। प्रशस्त पार्किङसहित साढे दुई तला रहेको घरमा १३ वटा कोठा रहेका छन् ।
२०७२ साल बैशाखमा गएको भूकम्पले बल्खुस्थित आफ्नै कार्यालय भवन भत्केपछि एमाले धुम्बाराहीस्थित पासाङ ल्यामु स्मृति प्रतिष्ठानको घरमा भाडामा बसिरहेको थियो ।
केही दिनअघि सम्पन्न एमाले केन्द्रीय कमिटी बैठकले बल्खुमा सुविधासम्पन्न नयाँ भवन बनाउने निर्णय गरिसकेको छ । आगामी बैशाख ९ गते पार्टी स्थापनाको अवसर पारेर सोही भवनको शिलन्यास गरिने बताइएको छ ।
एमाले पार्टीको नाममा बल्खुमा करिब १३ रोपनी जग्गा छ ।
प्रतिक्रिया