काठमाडौं । प्रदेश १ का मुख्यमन्त्री शेरधन राईले मन्त्रिपरिषद् विस्तार गरेका छन् । मुख्यमन्त्री राईले माओवादी केन्द्र छोडेर एमाले बनेका टंक आङ्वुहाङसहित दुई मन्त्री र दुई राज्यमन्त्री थप गरेका हुन् ।
आङ्वुहाङलाई आर्थिक मामिला मन्त्रालयको जिम्मा दिइएको छ । यसैगरी एमालेभित्र माधव नेपाल समुह परिवर्तन गरी ओली समुहमा लागेकी उषाकला राईलाई सामाजिक विकास मन्त्रालयको जिम्मा दिइएको छ । राई केही समयअघि उनका श्रीमान शेरबहादुर तामाङसहित माधव नेपाललाई छोडेर ओलीलाई समर्थन गर्न पुगेका थिइन ।
यसैगरी मुख्यमन्त्री राईले राजकुमार ओझालाई वन राज्यमन्त्रीमा नियुक्ति दिएका छन् भने कला घलेलाई कृषि राज्यमन्त्रीको जिम्मा दिएका छन् ।
यसअघि भौतिक पूर्वाधार विकास मन्त्रालयका राज्यमन्त्री अम्बिरबाबु गुरुङ र भूमि व्यवस्था, कृषि तथा सहकारी राज्यमन्त्री रामबहादुर मगर फुल मन्त्री बनेका छन् । मगर पनि यसअघि नेपाल पक्ष रहेका थिए ।
प्रधानमन्त्री केपी शर्मा ओलीले गत पुस ५ गते प्रतिनिधि सभा विघटन गरेपछि प्रदेश १ का प्रचण्ड र नेपाल पक्षका मन्त्रीहरुले राजीनामा दिएका थिए। त्यसपछि पुष १२ गते तत्कालिन नेकपाका ३७ जना सांसदहरुले मुख्यमन्त्री राई विरुद्ध अविश्वासको प्रस्ताव दर्ता गराएका थिए ।
प्रदेश १ को एमालेको संसदीय दल बैठकले एक हप्ताभित्र अविश्वासको प्रस्ताव फिर्ता लिन त्यसमा हस्ताक्षर गरेका सांसदहरुलाई निर्देशन दिइसकेको छ ।
प्रतिक्रिया