एजेन्सी । स्पेनिस ‘एल क्लासिको’ मा बार्सिलोनालाई हराउँदै रियल म्याड्रिड स्पेनिस ला लिगाको शीर्षस्थानमा उक्लिएको छ ।
गएराति भएको खेलमा रियलले बार्सिलोनालाई आफ्नै मैदानमा २-१ गोल अन्तरले पराजित गरेको हो । रियललाई जित दिलाउनको लागि करिम बेन्जेमा र टोनी क्रुसले गोल गरे । बार्सिलोनाका ओस्कार मिगुएजाले गोल फर्काए ।
रियलले दुवै गोल पहिलो हाफमा गरेको थियो भने बार्सिलोनाले दोस्रो हाफमा गोल फर्काएको थियो । खेलको १३ औँ मिनेटमा बेन्जेमाले गोल गर्दै रियललाई अग्रता दिलाएका थिए । २८ औँ मिनेटमा टोनी क्रुसले गोल गर्दै अग्रता दोब्बर बनाए ।
६० औं मिनेटमा मिगुएजाले गोल गर्दै बार्सिलोनालाई खेलमा फर्काउन संकेत दिए । बल पोजिसनमा बार्सिलोनाले दबाबमा राखेपनि त्यसपछि गोल गर्न नसक्दा खेल रियलले जित्यो ।
यो जितसँगै रियल लेगको शीर्षस्थानमा उक्लिएको छ । रियलले ३० खेलबाट ६६ अंक जोडेको छ । समान ६६ अंक भएपनि हेड टु हेडमा रियलले एट्लेटिकोलाई पछि पारेको हो । एट्लेटिकोले एक खेल कम खेलेको छ । पराजित बार्सिलोना ६५ अंक जोडेर तेस्रो स्थानमा झरेको छ ।
प्रतिक्रिया