चितवनको भरतपुरमा म्याजिक दुर्घटना; दुई जनाको मृत्यु, सात घाइते

चितवन । चितवनको भरतपुरबाट शारदानगर जाँदै गरेको म्याजिक गाडी दुर्घटना हुँदा दुई जनाको मृत्यु भएको छ ।

आइतबार बिहान ९ बजेतिर भरतपुरबाट शारदानगर जाँदै गरेको ना १ ज ३८५९ नं.को म्याजिक गाडी अनियन्त्रित भई कल्भर्टमा खस्दा दुर्घटनामा परेको थियो । दुर्घटनामा दुई पुरुषको मृत्यु भएको जिल्ला प्रहरी कार्यालय चितवनले जनाएको छ । मृतकको सनाखत हुँन बाँकी छ ।

यसैगरी सात जना यात्रु घाइते भएका छन् । तीमध्ये तीनजनाको अवस्था गम्भीर रहेको प्रहरीले जनाएको छ । म्याजिक चालक शारदानगरका रमेश थापाको दुवै खुट्टा भाँचिएको छ । उनको चितवन मेडिकल कलेजमा उपचार भैरहेको छ ।

घाइतेहरुको पुरानो मेडिकल कलेज, चितवन मेडिकल कलेज, भरतपुर अस्पतालमा उपचार भैरहेको छ । सामान्य घाइते एक जनाको रामपुरस्थित स्थानीय मेडिकलमा उपचार भएको छ ।