वीरगन्ज । नेकपा एमालेका वरिष्ठ नेता माधवकुमार नेपालले पार्टी विवादबारे निर्वाचन आयोगमा परेको उजुरीमाथि कुनै सुनुवाई नभएकोमा आपत्ति जनाएका छन् ।
वीरगन्जमा सञ्चारकर्मीहरुसँग कुरा गर्दै नेता नेपालले संवैधानिक आयोगमा परेको उजुरीमाथि कुनै छानविन नगरिनु बिडम्बना भएको बताए ।
‘पार्टीको कामकारवाहीको विषयमा कुन निर्णय ठीक छ, कुन बेठीक छ भन्ने बारेमा निर्णय गर्न निर्वाचन अयोग छ, तर अहिलेसम्म कुनै निर्णय आएको छैन, के भन्ने कहाँ गएर उजुरी गर्ने, कहाँ विरोध गर्ने ?’ नेपालले गुनासो गरे ।
सर्वोच्च अदालतले नेकपा खारेजगरेसँगै ब्युँतिएको नेकपा एमालेमा अध्यक्ष केपी शर्मा ओलीले एकलौटी निर्णय गर्दै फागुन २८ गते विधान संशोधन र २३ जना केन्द्रीय सदस्य थप गरेका थिए । नवौं महाधिवेशनबाट निर्वाचित पदाधिकारी हटाउने, अध्यक्षमा शक्ति केन्द्रित गर्ने, आफुखुशी केन्द्रीय कमिटीको संख्या बढाउने काम विधान विपरित भएको भन्दै त्यसलाई रोक्न नेपाल पक्षले निर्वाचन आयोगमा उजुरी गरेको थियो ।
नेता नेपालले आफुहरुले देशभर समानान्तर कमिटी बनाउने गरेको निर्णय सही भएको जिकिर गरे । उनले पार्टीलाई ओलीले पेवा सम्झेको आरोप लगाउँदै विधान विपरित गरिएका गतिविधि विरुद्ध आफुहरुले चालेको कदम ठीक भएको बताए । नेता नेपालले ओलीले मनपरीतन्त्र र अधिनायकवाद लादेर पार्टीलाई संकटमा पुर्याएको बताए ।
नेपालले भने, ‘अहिले कार्यकर्ताहरुमा छाएको निराशालाई आत्मसात गर्दै नेकपा एमालेले पार्टी सुदृढिकरण अभियान चलाएको छ । हरेक वडा, पालिका, जिल्ला, प्रदेशमा समानान्तर कमिटि गठन गरेर कसरी यस्तो अवस्था आयो भन्ने बारेमा राज्यव्यापी रुपमा अघि बढेका छौं ।’
पार्टीलाई एकतावद्ध बनाउन २०७५ जेठ २ को अवस्थामा फर्किनुको विकल्प नभएको नेता नेपालले बताए ।
नेता नेपालले नयाँ सरकार गठनको विषय विपक्षी दलहरुको अधिकारको कुरा भएको जनाए ।
प्रतिक्रिया