काठमाडौं । नेकपा एमालेको नेपाल पक्षले पार्टी अध्यक्ष एवं संसदीय दलका नेता केपी शर्मा ओलीले सोधेको स्पष्टीकरणको जवाफ दिने निर्णय गरेको छ ।
नेता नेपाल र झलनाथ खनालसहित उनी पक्षीय २७ जना संघीय सांसद र ५ जना प्रदेश सांसदलाई अध्यक्ष ओलीले कारवाही गर्ने उद्देश्यले स्पष्टीकरण सोधेपछि मंगलबार अपरान्ह बसेको बैठकले कानुनी र राजनीतिक लडाईं लडने निर्णय गरेको हो ।
नेपाल पक्षीय सांसदहरुको बैठकले आफुहरुले नेकपा एमालेको तर्फबाट गरेको गतिविधि सही भएको ठहराएको छ । ओलीको मनोमानि विरुद्ध प्रतिवाद गरेकै कारण स्पष्टीकरण सोधिएको ठहर गर्दै बैठकले आफुहरु अदालतले ब्यूँताइदिएपछि २०७५ जेठ २ गते अघिको आधिकारिक एमाले भएको पुनः स्पष्ट गरेको छ ।
बैठकपछि सांसद एवं नेतृ रामकुमारी झाँक्रीले भनिन, ‘हामीले दल बदल गरेका छैनौं, राजीनामा पनि दिएका छैनौं । अर्को पार्टी खोलेका पनि छैनौं । दर्ता गर्ने मनसाय पनि छैन । एमालेको केन्द्रीय सदस्य हौं, एमालेको सांसद हौं ।’
‘हामी स्पष्टीकरण दिन्छौं, कानुनी प्रतिरक्षा गर्छौं र राजनीतिक लडाइँ पनि लड्छौं ।’, झाँकीले भनिन्, ‘यो कुनै स्पष्टीकरण दिनलायक स्पष्टीकरण सोधिएको त होइन । स्पष्टीकरण दिएनौं भने प्रतिरक्षा नगरेको हुन्छ । हामी अदालतसम्म जान्छौं ।’
नेपाल पक्ष ओलीले १० गते बोलाएको महाधिवेशन आयोजक कमिटी बैठकमा पनि नजाने भएको छ ।
प्रतिक्रिया