काठमाडौं । नेकपा एमालेले कर्णाली प्रदेशमा पार्टीको ह्वीप उल्लंघन गर्ने चार सांसदलाई पार्टीबाट निस्काशन गरेको छ ।
एमालेको दशौं महाधिवेशन आयोजक कमिटीको शुक्रबार बसेको बैठकले पार्टी संसदीय दलको ह्वीप उल्लंघन गरी फ्लोर क्रस गर्ने सांसदहरुलाई पार्टीको साधारण सदस्य समेत नरहने गरी निस्काशन गरेको हो ।
चारै जना सांसदले फ्लोर क्रस गरी मुख्यमन्त्री महेन्द्र बहादुर शाहीलाई बैशाख ३ गते प्रदेशसभामा विश्वासको मत दिएका थिए । पार्टीबाट निस्काशित हुनेहरुमा प्रदेश सांसदहरु प्रकाश ज्वाला, अम्मरबहादुर शाही, कुर्मराज शाही र नन्दसिंह बुढा रहेका छन् । विश्वासको मत दिएर पनि पछि सच्चाएकी देवी ओली भने कारवाही गरिएको छैन ।
उनीहरुलाई पार्टीले औपचारिक रुपमा कारावाही गरेपछि अब सांसद पदि समेत खारेज हुने भएको छ । यस्तै बैठकले प्रतिनिधिसभाका २७ सांसदमाथि कस्तो कारवाही गर्ने निर्णय गर्ने अधिकार स्थायी कमिटीलाई दिएको छ । यही बैशाख ७ गते अध्यक्ष एवं संसदीय दलका नेता केपी शर्मा ओलीले माधवकुमार नेपाल, झलनाथ खनालसहित २७ जना सांसदलाई कारवाही किन नगर्ने भन्दै स्पष्टीकरण सोधेका थिए ।
प्रतिक्रिया