बाँकेमा ३ घण्टाकाबीचमा ३ जना कोरोना संक्रमितको मृत्यु

नेपालगन्ज । बाँकेमा कोरोना संक्रमणबाट मृत्यु हुनेको संख्या ३ जना थपिएको छ । भेरी अस्पताल नेपालगन्जमा उपचाररत एक महिला र दुई पुरुषको आज साँझ उपचारकै क्रममा मृत्यु भएको हो । उनीहरुको ३ घण्टाकाबीचमा मृत्यु भएको थियो ।

भेरी अस्पतालमा उपचाररत नेपालगन्ज २ की ७५ वर्षिया महिलाको साँझ ६ः१५ बजे मृत्यु भएको छ भने नेपालगन्ज ५ का ८६ वर्षिय पुरुषको साँझ ७ बजे मृत्यु भएको बाँकेका कोरोना फोकलपर्शन तेज ओलीले बताएका छन् । ओलीका अनुसार आजै साँझ नेपालगन्ज त्रिभुवन चौक ठेगाना भएका ३५ वर्षिय पुरुषको पनि मृत्यु भएको छ । उनको राती ९ः२३ बजे मृत्यु भएको थियो ।

आज मृत्यु भएसँगै बाँकेमा कोरोना संक्रमणबाट मृत्यु हुनेको संख्या ७५ पुगेको छ । मृतकहरुको शव नेपाली सेनाको समन्वयमा परिवारबाट दाहसंस्कारको ब्यवस्था हुँदै गरेको फोकलपर्शन ओलीले बताए ।