कोरोना संक्रमित थपिने संख्या अहिले सम्मकै उच्च, आज थपिए ७२११ नयाँ संक्रमित, २७ जनाको मृत्यु

काठमाडौं । नेपालमा कोरोना संक्रमणको दरले अहिले सम्मकै रेकर्ड तोडेको छ । कोरोना माहामारीको दोस्रो कहर सुरुभएपछिकै सबै भन्दा बढी आज ७ हजार २११ जनामा कोरोना भाइरस संक्रमण पुष्टि भएको छ ।

स्वास्थ्य तथा जनसंख्या मन्त्रालयले दिएको जानकारी अनुसार १६ हजार १४७ नमुना परीक्षणमा ७ हजार १३७ जना र ६२३ एन्टिजेन परीक्षणमा ७४ जना गरी एकै दिन ७ हजार २११ जनामा कोरोना संक्रमण पुष्टि भएको हो । यो संख्या नेपालमा अहिले सम्मकै उच्च हो ।

कोरोना संक्रमणका कारण पछिल्लो २४ घण्टामा थप २७ जनाको मृत्यु भएको छ । एकै दिन ठूलो संख्यामा मृत्यु भएको पनि दछिल्ले लहरको यो नै उच्च हो ।

देशभर कोरोना भाइरसको सक्रिय संक्रमितको संख्या ४८ हजार ७११ पुगेको छ । जसमध्ये तीन हजार ५३० जना संस्थागत आइसोलेसनमा छन् । ४५ हजार १८१ जना होम आइसोलेसनमा रहेको छ । उपचाररत संक्रमितमध्ये ४७७ जना आईसीयूमा रहेका छन् ।

पछिल्लो २४ घण्टामा १६१२ जना कोरोना भाइरस संक्रमणमुक्त भएको मन्त्रालयले जनाएको छ ।