रुपन्देहीमा अहिले सम्मकै धेरै संक्रमित थपिए, मंगलबार थपिए ७९७ जना, बुटवलमा मात्रै ३३२

जिल्लामा निषेधाज्ञा फितलो, तोडिएन कोरोनाको ‘चेनब्रेक’
खबर कुरा
२१ बैशाख २०७८, मंगलवार

बुटवल । स्थानीय प्रशासनले निषेधाज्ञालाई कडा बनाएको दाबी गरेपनि रुपन्देहीमा कोरोना संक्रमित थपिने क्रम घटेको छैन । जिल्लामा निषेधाज्ञा जारी गरेको छैठौं दिन रुपन्देहीमा अहिले सम्मकै बढी संक्रमित थपिएका छन् । स्वास्थ्य कार्यालय रुपन्देहीले दिएको जानकारी अनुसार पछिल्लो २४ घण्टामा जिल्लामा ७९७ जनामा कोरोना संक्रमण पुष्टि भएको छ ।

स्थानीय प्रशासनले जारी गरेको निषेधाज्ञा प्रभावकारी कार्यान्वयन हुन नसक्दा जिल्लामा हरेक दिन संक्रमितको संख्या बढ्दै गएको हो । सुचनामा पूर्णरुपमा निषेधाज्ञा गरिएको भनिएपनि जिल्लाका भित्रि बजार र बिहानी तरकारी, मासु तथा उपभोग्य समानका पसलहरुमा लाग्ने भिडमा कुनै कमी आएको छैन ।

आज पनि बुटवल संक्रमित थप्ने पालिकामा अग्रभागमा रहेको छ । बुटवल उप महानगरमा मात्र ३३२ जना नयाँ संक्रमित थपिएका छन् । तिलोत्तमामा १५८ जना, सिद्धार्थनगरमा १०८ जना, देवदहमा ४२ जना, सुद्धोधनमा ५७ जना र सैनामैनामा ३५ जना नयाँ संक्रमित थपिएका छन् । त्यसैगरि ओमसतियामा २२ जना, रोहिणीमा १९ जना, सियारीमा ८ जना, कञ्चनमा ६ जना, मायादेबीमा ५ जना, गैडहवामा ३ जना र मर्चवारी र लुम्बिनी सांस्कृतिक नगरमा १।१ जनामा संक्रमण पुष्टि भएको स्वास्थ्य कार्यालयले जनाएको छ ।

रुपन्देहीमा पछिल्लो २४ घण्टामा ४ जनाको मृत्यु भएको छ भने २२२ जना संक्रमित संक्रमण मुक्त भएर घर फर्केका छन् । जिल्लामा १५७ जना लक्षण सहितको संक्रमितहरुले अस्पताल तथा आइसोलेशनमा उपचार गराईरहेका छन् भने ४५१९ जना होम आइसोलेशनमा रहेका छन् ।

यसमा तपाइको मत

Your email address will not be published. Required fields are marked *


*