लुम्बिनी प्रादेशिक अस्पतालमा अक्सिजनको चरम अभाव, आपुर्ति बढाउन नसकिए थाम्न नसकिने अस्पतालको भनाई

बुटवल । बुटवल स्थित लुम्बिनी प्रादेशिक अस्पतालमा अक्सिनको स्टक सकिन थालेपछि भर्ना भएका बिरामीहरु जोखिममा पर्ने भएका छन् ।

अक्सिजन सप्लायर्सले समयमा अक्सिजन आपुर्ति नगरिदिँदा अस्पतालमा मौज्दात अक्सिजन सकिन थालेको र कोरोना संक्रमितको चाप बढ्दै गएपछि अस्पतालमा उपचाररत बिरामी ठूलो संकटमा पर्ने अवस्था देखिएको हो ।

बिरामीको चाप अत्याधिक र अक्सिजन आपूर्ति पुरानै अवस्था हुनुका साथै समयमा आपुर्ति नहुँदा चरम अभावको अवस्था देखिन थालेको हो ।

लुम्बिनी प्रादेशिक अस्पतालका सूचना अधिकारी विष्णु गौतमले अस्पतालमा आज दिउँसो सम्मका लागि मात्र अक्सिजन मौज्दात रहेको र तत्काल थप अक्सिजन आपुर्ति नभए अवस्था नाजुक हुन सक्ने बताए ।

डा. गौतमका अनुसार अस्पतालमा नियमित चलिरहेको उपचारको हकमा अहिले दैनिक २०० सिलिण्डरको माग रहेको छ । आपूर्ति दैनिक ८० देखि १०० सिलिण्डर मात्र छ । ‘हिजो ६० सिलिण्डर आएको थियो आज कतिबेला कति झर्ने हो थाहा छैन, आपूर्ति नबढाउने हो भने अवस्था खतरा तर्फ जाँदैछ,’ उनले भने ।

बुटवलमा मात्रै अहिले दैनिक ३०० बढी कोरोना संक्रमित थपिँदै गएका छन् । अस्पतालले अहिले नेपालगञ्जबाट अक्सिजन ल्याइरहेको छ । जताततै अक्सिजनको माग आएको भन्दै सप्लायर्सले नियमित भन्दा बढी आपुर्ति गर्न नसक्ने बताएपछि समस्या आएको डा. गौतमले बताए । अस्पतालले अन्य आपूर्तिको पहल भइरहेपनि अहिले सम्म कुनै सप्लायर्ससँग सम्झौता हुन नसकेको उनले बताए । अस्पतालकै अक्सिजन प्लान मरमत गरि संचालनमा ल्याईएको जानकारी दिंदै थोरै भएपनि त्यसले राहत पुग्ने डा. गौतमले बताए ।

प्रादेशिक अस्पताल मातहत रहेको धागो कारखानास्थित कोरोना विशेष अस्पतालमा दैनिक १५० सिलिण्डरको खपत हुँदै आएको छ । संक्रमित बढेपछि त्यहाँको पनि माग बढेको छ ।

लुम्बिनी प्रादेशिक अस्पतालको फिवर क्लिनिकमा आउने कोरोना शंका लागेका बिरामीलाई पनि इमर्जेन्सीमा राखेर उपचार गरिने गरि ब्यवस्था मिलाईएको छ । अस्पतालमा दैनिक २०० भन्दा बढी बिरामी आउने गरेको प्रवक्ता डा. गौतमले बताए ।

अस्पतालका मेडिकल सुपरिटेन्डेन्ट डा. राजेन्द्र खनालले नागरिक हेल्प डेस्कबाट दैनिक ४०० देखि ५०० सिलिण्डर अक्सिजन आपुर्ति गरिदिन सामाजिक सञ्जाल मार्फत याचना गरेका छन् । उनले अहिले सप्लायरबाट आपूर्ति भएको १००-१५० सिलिन्डर अक्सिजनले थाम्न नसकिने समेत बताएका छन् ।

‘अझ हामीले २-४ दिनमै अर्को एच डी यू खोल्दा र अन्य अक्सिजन बेड थप्दा सम्भव भए ३०-३५ बेडको अर्को कोभिड आइ. सी. यू. बनाउंदा कम्तिमा १००० सिलिन्डरको आपूर्ति हुनुपर्ने हुन्छ, कसरी गर्नु ब्यवस्था ? लौ न हजुर, केही त गरौं ! ‘ उनले आफ्नो फेसबुक वालमा याचना गरेका छन् ।