चितवन । चितवन जिल्लामा कोरोना रोकथामका लागि खटिएका चिकित्सक र स्वास्थ्यकर्मी संक्रमित हुन थालेका छन् ।
कोरोनाको दोस्रो लहरसँगै जिल्लाका अस्पतालमा कार्यरत चिकित्सक, नर्स, स्वास्थ्यकर्मी र कर्मचारी गरी ८६ जना संक्रमित भएको स्वास्थ्य कार्यालय चितवनले जनाएको छ ।
कार्यालयका जनस्वास्थ्य अधिकृत गीताञ्जली ढकालका अनुसार भरतपुर अस्पतालमा २२, चितवन मेडिकल कलेजमा २२, पुरानो मेडिकल कलेजमा १९, बीपी कोइराला मेमोरियल क्यान्सर अस्पतालका १६ जना रहेका छन् ।
बघौडा अस्पताल माडी, राप्ती अस्पताल भण्डारा, बकुलहर अस्पताल रत्ननगर, कालिका नगर अस्पताल लगायतका अस्पतालका चिकित्सक, स्वास्थ्यकर्मी ७ जना संक्रमित भएका उनले जानकारी दिए ।
उनका अनुसार संक्रमित चिकित्सक र स्वास्थ्यकर्मी अहिले अइसोलेसनमा रहेका छन् । उनीहरूमध्ये कतिपय सन्चो भएर घर फर्किसकेका छन् । कार्यालयका अनुसार जिल्लामा कोरोना रोग नियन्त्रणमा खटिएका प्रहरी प्रमुख समेतलाई संक्रमण देखिएको छ ।
जिल्लामा वैशाखमा मात्रै २ हजार ८० जनामा संक्रमण देखिएको छ । जसमध्ये १७ जनाको मृत्यु भइसकेको कार्यालयको तथ्यांकमा उल्लेख छ । जिल्लामा हाल औसत दैनिक ७ जना संक्रमितको मृत्यु भएको छ । तीमध्ये अधिकांश बाहिरी जिल्लाका छन् । रासस
प्रतिक्रिया