नेपाल पक्षीय सांसदहरु संसद सचिवालयमा, पौडेल र नेम्वाङले नेपाल फकाउँदै

खबर कुरा
२६ बैशाख २०७८, आईतवार
                 

काठमाडौं । पार्टीलाई २०७५ जेठ २ अघिको अवस्थामा फर्काउनुपर्ने माग पुरा नभए सांसद पदबाट राजीनामा दिने योजना बनाएको एमालेको नेपाल खनाल पक्षका सांसदहरु संसद सचिवालयमा भेला हुन थालेका छन् ।

शनिबार राति अध्यक्ष एवं प्रधानमन्त्री केपी शर्मा ओलीलाई २४ घण्टे अल्टिमेटम दिएको नेपाल पक्षका सांसदहरुले हिजै व्यक्तिगत राजीनामापत्रमा हस्ताक्षर गरेका थिए । राजीनामा दिनुपर्ने अन्तिम अवस्था र त्यसपछिको रणनीति तय गर्न स्थायी कमिटी सदस्यहरु आन्तरिक छलफलमा रहेकै बेलामा नेपाल पक्षीय सांसदहरु संसद सचिवालय सिंहदरबारमा पुगेका हुन् । वरिष्ठ नेता माधवकुमार नेपाल पनि संसद सचिवालयमा पुगेका छन् ।

दिउँसो ३ बजेदेखि सांसदहरु सचिवालय परिसरमा जम्मा भैरहेका छन् । शिर्ष नेतृत्वको आन्तरिक छलफल पछि आउने निर्णयका लागि तयारी अवस्थामा रहनका लागि सांसदहरु एकै स्थानमा जम्मा भएका हुन् ।

 

यो पनि पढ्नुहोस : सांसद पदबाट राजीनामाबारे अन्तिम निर्णय लिन नेपाल(खनाल पक्षको स्थायी कमिटी बैठक बस्दै

 

यसैबीच अध्यक्ष ओलीले नेता नेपासँग छलफल गर्न विष्णु पौडेल र सुवास नेम्वाङलाई पठाएका छन् । सिंहदरबारमै रहेका पौडेल र नेम्वाङले नेपालसँग गरेका छन् । राजीनामाको तयारीसहित नेपाल पक्षीय सांसदहरु संसद सचिवालयमा भेला हुन थालेपछि पौडेल र नेम्वाङले नेता नेपालसँग छलफल गरेका हुन् ।

प्रधानमन्त्री केपी शर्मा ओलीले भोलि सोमबार विश्वासको मत लिँदैछन् । जनता समाजवादी पार्टी जसपाले समर्थन नगर्ने भैसकेका कारण ओलीले विश्वासको मत हासिल गर्नसक्ने सम्भावना समाप्त भैसकेको छ । यद्यपी, आफ्नै दलका सांसदहरुबाट समेत राजीनामा आउँदा घट्ने संसदको कुल संख्याका आधारमा विपक्षीहरुलाई नयाँ सरकार बनाउन सजिलो हुनेभएका कारण ओलीले जसरी पनि त्यसलाई रोक्ने प्रयत्नका लागि प्रयास गरेका हुन् ।

 

 

 

यसमा तपाइको मत

Your email address will not be published. Required fields are marked *


*