अपरान्ह ४ बजेसम्म माग पुरा गर्न नेपाल-खनाल पक्षद्वारा ओलीलाई दबाब

खबर कुरा
३० बैशाख २०७८, बिहीबार
                 

काठमाडौं । नेकपा एमालेका माधवकुमार नेपाल र झलनाथ खनाल पक्षले पार्टी अध्यक्ष केपी शर्मा ओलीलाई फेरि दबाब दिएका छन् ।

यसअघि पनि पटकपटक दबाब दिँदै पछि हट्दै आएका नेपाल-खनाल समुहले बिहीबार अपरान्ह ४ बजेसम्म आफुहरुले उठाउँदै आएका एजेण्डामा प्रतिवद्धता जनाउन ओलीलाई समय दिएका हुन् ।

२६ गते राति वरिष्ठ नेता नेपालले ओलीलाई पठाएको ६ बुँदे माग सम्बोधन गर्नुपर्ने रावलको भनाइ छ । त्यो बेलासम्म पनि मागबारे सहमति नजनाए आफुहरुले राजीनामा दिने नेता भीम रावलले बताए । रावलले यसअघि नै राजीनामा दिइहाल्नुपर्ने मत राख्दै आएका छन् । तर, नेपाल खनाल समुहभित्रै ओली पक्षसँग कसरी प्रस्तुत हुने सम्बन्धमा एकमत नबनेका कारण यसअघि वैशाख २७ गते पनि उनीहरुको सामुहिक राजीनामाको अल्टिमेटम संसद बहिस्कारमा पुगेर टुंगिएको थियो ।

नेपाल खनाल पक्ष निकट स्थायी कमिटी सदस्यहरुको बैठक अपरान्ह ४ बजे बस्दैछ । सो बैठक अगाडि अध्यक्ष ओलीले आफ्ना माग पुरा गरुन भन्ने यो पक्ष चाहन्छ । अध्यक्ष ओलीले भने आजै बिहान स्थायी कमिटी बैठकमार्फत नेता नेपालसहित रावल, घनश्याम भुसाल, सुरेन्द्र पाण्डेलाई गरेको ६ महिनासम्मको निलम्बनको कारवाही फिर्ता गरेका थिए । अ‍ोलीले पार्टी एकता जोगाउने भन्दै कारवाही फिर्ता लिएसँगै नेता नेपाललाई फोन गरेर छलफलको प्रस्ताव गरिसकेका छन् ।

नेपाल खनाल पक्षका योगेश भट्टराई र सुरेन्द्र पाण्डेले कारवाही फिर्ता सकारात्मक भएको भन्दै जेठ २ अघिको स्थायी कमिटी बैठक बस्नुपर्ने माग गरेका छन् ।

नेपाल खनाल पक्षका कम्तिमा २० जना सांसदले राजीनामा नदिए विपक्षी कांग्रेस माओवादी र जसपाको यादव पक्षको गठबन्धनले नयाँ सरकार बनाउने उद्देश्य समाप्त हुन्छ । यसअघि नेपाल पक्षले विपक्षी गठबन्धनलाई सरकार बनाउन सहयोग पुग्नेगरी आफु निकटका सांसदहरुले राजीनामा दिएर ओलीलाई प्रधानमन्त्रीबाट हटाउने प्रतिवद्धता जनाएका थिए ।

 

 

 

यसमा तपाइको मत

Your email address will not be published. Required fields are marked *


*