काठमाडौं । जनता समावादी पार्टी (जसपा) को उपेन्द्र समूहले प्रधानमन्त्री केपी ओलीले सपथ ग्रहणका बेला देखाएको कार्यको विरोध जनाएको छ । जसपाले सपथका बेला राष्ट्रपतिले उच्चारण गरेको महत्वपूर्ण वाक्यमा ‘त्यो पर्दैन’ भनेर अवज्ञा गरेको भन्दै प्रधानमन्त्री ओलीलाई पुनः सपथ गराउन माग गरेको छ । जसपा उपेन्द्र समूहले प्रधानमन्त्री ओलीले वैशाख ३१ गते लिएको शपथ बदर गरी पुनः शपथ ग्रहण गराउन माग गरेको हो ।
प्रधानमन्त्री ओलीले शुक्रबार पद तथा गोपनीयताको शपथ ग्रहण गर्दा दुइटा महत्वपूर्ण अंश भन्न छुटाएका थिए। ‘मुलुक र जनताप्रति पूर्ण बफादार रही सत्य निष्ठापूर्वक यो प्रतिज्ञा गर्छु कि’ भनेर राष्ट्रपति विद्या भण्डारीले शपथ गराउँदा ओलीले ‘यो प्रतिज्ञा गर्छु कि’ भन्ने वाक्यांश छुटाएर ‘त्यो पर्दैन’ भनेर बाँकी सपथ लिएका थिए ।
संविधानको धारा ७६ को उपधारा (३) बमोजिम प्रधानमन्त्रीमा नियुक्त भएका ओलीले वैशाख ३१ गते राष्ट्रवपति विद्यादेवी भण्डारीबाट शपथ ग्रहण गर्दा ‘प्रतिज्ञा गर्दछु’ भन्ने शब्द उच्चारण गर्न मानेका थिएनन् ।
जसपाका अध्यक्ष उपेन्द्र यादवले आइतबार विज्ञप्ति जारी गर्दै प्रधानमन्त्री ओलीले शपथग्रहण गर्ने क्रममा राष्ट्रपति र प्रधानमन्त्री पदको मर्यादा र गरिमामा गम्भीर आँच पुर्याएको भन्दै पुनः शपथग्रहण गराउन माग गरेको हो ।
‘२०७८ वैशाख ३१ गते सम्माननीय प्रधानमन्त्रीको सपथग्रहणमा सम्माननीय राष्ट्रपतिद्वारा वाचन भएको सत्यनिष्ठापूर्वक प्रतिज्ञा गर्दछु भन्ने वाक्यांशमा प्रतिज्ञा गर्दछु नभनी सत्यनिष्ठापूर्वक ‘त्यो पर्दैन’ भनेर ग्रहण गरेकाले यसले देशको राष्ट्रपति र प्रधानमन्त्री पदको मर्यादा र गरिमामा गम्भीर आँच पुगेको हुँदा उक्त शपथग्रहण बदर गरी पुनः शपथग्रहण गर्न गराउन हाम्रो पार्टी माग गर्दछ ।’ विज्ञप्तिमा भनिएको छ ।
सपथका विरुद्ध सर्वोच्च अदालतमा समेत पुनः सपथ गराउन माग गर्दै रिट निबेदन समेत परेको छ ।
प्रतिक्रिया