बुटवल । लुम्बिनी प्रदेशमा पहिलो पटक रुपन्देहीको तिलोत्तमामा ट्राफिक लाईट जडान गरिएको छ । अत्यन्त ट्राफिक जाम हुने र सवारी दुर्घटना समेत बढी हुने गरेको बुटवल भैरहवा सडक खण्डको मणिग्राम चौकमा ट्राफिक लाईट जडान गरिएको हो ।
नगरकै सबैभन्दा बढी सवारी आवागमन हुने मणिग्राम चोकमा तिलोत्तमा नगरपालिकाले आफ्नै स्रोतमा ट्राफिक लाइट व्यवस्थापन गरेको हो । नगरपालिकाका अनुसार ट्राफिक लाइटको कन्ट्रोल मंगलापुरमा रहेको ट्राफिक प्रहरी पोष्टबाट हुने छ भने चौकमा प्रत्यक्ष निगरानी जिल्ला ट्राफिक प्रहरी कार्यालय भैरहवाले गर्ने छ ।
मणिग्राम चौकको चारतर्फ जडान भएको ट्रफिक लाइटको उदघाटन मंगलबार तिलोत्तमा नगरपालिकाका नगर प्रमुख बासुदेव घिमिरेले गरे । उदघाटन कायैक्रममा बोल्दै नगर प्रमुख घिमिरेले मणिग्राममा जडान गरिएको ट्राफिक लाइटको प्रभावकारितासँगै यसलाई सिक्सलेन सडकका अन्य चोकहरुमा समेत विस्तार गरिने बताए । ट्राफिक लाइटको कन्ट्रोलका लागि चाहिने उपकरण व्यवस्थापनमा ट्राफिक प्रहरीलाई नगरपालिकाले सहयोग गर्ने स्पष्ट पार्दै उनले ट्राफिक लाइटको परिपालना, यसको संरक्षण गर्ने दायित्व सबै नगरबासीको रहेको बताए ।
सो अवसरमा बोल्दै लुम्बिनी प्रदेश ट्राफिक प्रहरी कार्यालयका प्रमुख डम्बर बहादुर विश्वकर्माले तिलोत्तमाले आफ्नै स्रोतमा ट्राफिक लाइटको व्यवस्थापन गर्नु अरुको लागि पनि अनुकरणीय रहेको बताए । उनले ट्राफिक प्रहरीसँगको समन्वयमा ट्राफिक लाइट जडान गरेर तिलोत्तमाले प्रदेशमैं नयाँ सन्देश दिएको बताउँदै ट्राफिक लाईटले दुर्घटना न्युनिकरण गर्ने विश्वास ब्यक्त गरे ।
जिल्ला प्रहरी कार्यालय रुपन्देहीका प्रमुख प्रहरी उपरीक्षक मनोज कुमार केसीले ट्राफिक लाइट सडक विकासको एउटा सूचक रहेको चर्चा गर्दै यसले ट्राफिक व्यवस्थापनमा टेवा पुर्याउने बताए ।
नगर उपप्रमुख जागेश्वरी चौधरीले प्रविधिको प्रयोगले ट्राफिक व्यवस्थापनलाई प्रभावकारी बनाउँदा दुर्घटना न्यूनीकरणमा टेवा पुग्ने बताए ।
प्रतिक्रिया