काठमाडौं । प्रतिनिधिसभा विघटन विरुद्ध परेको रिटमाथि सुनुवाइका लागि संवैधानिक इजलासलाई सहयोग गर्न सर्वोच्च अदालत बार एशोसिएसनले दुई जना एमिकस क्यूरीको नाम सिफारिस गरेको छ ।
सर्वोच्च बारले मंगलबार वरिष्ठ अधिवक्ता कोमल प्रकाश घिमिरे र प्रकाश बहादुर केसीलाई अदालतको एमिकस क्युरीमा सिफारिस गरेको हो ।
संवैधानिक इजलासले गत जेठ २६ गते इजलासको सहयोगीको रुपमा सर्वोच्च बारबाट दुई जना र नेपाल बारबाट दुई जना गरी चार जनाको नाम माग गरेको थियो । एमीकस क्यूरीले रिटमाथि दुई घण्टामा आफ्नो धारणा गर्न समय छुट्याइएको छ । कुनै पनि विशेष महत्व राख्ने मुद्दामा सुनुवाइ गर्न इजलासले एमिकस क्यूरी मगाउने गर्छ । एमिकस क्यूरीले आफ्नो राय दिने गर्छन् । यसअघिको प्रतिनिधिसभा विघटनमा पाँच जना एमीकस क्यूरी माग भएको थियो ।
रिटमाथि असार ९ गतेबाट निरन्तर सुनुवाई हुनेछ । प्रधानन्यायाधीश चोलेन्द्र शम्शेर जबरा नेतृतवको संवैधानिक इजलासले जेठ २६ गते शेरबहादुर देउवासहितका १४६ जना सांसदको निवेदनमा सुनुवाइ गर्दै असार ९ गतेदेखि निरन्तर सुनुवाइ हुने जनाएको थियो ।
इजलासले सरकारका नाममा कारण देखाउ आदेश जारी गरेको छ । यस्तै रिट निवेदक तथा विपक्षको तर्फबाट बहस गर्ने कानून व्यवसायीहरुलाई असार १० गतेभित्र बहस नोट पेश गर्न भनिएको छ ।
प्रतिक्रिया