काठमाडौं । नेकपा माओवादी केन्द्रले पार्टी परित्याग गरेका नेताहरु र स्थानीय तहका जनप्रतिनिधिहरुको विवरण निर्वाचन आयोगमा पुनः बुझाउने भएको छ ।
माओवादी केन्द्रको सोमबार बसेको केन्द्रीय समिति बैठकले दल त्याग गरेका नेताहरु र जनप्रतिनिधिहरुको विवरण आयोगमा पुनः बुझाउने निर्णय गरेको हो ।
यसअघि नै पार्टी परित्याग गरेर अर्को पार्टीमा प्रवेश गरिसकेका केन्द्रीय नेताहरु र जनप्रतिनिधिबारे आयोगलाई जानकारी गराए पनि केन्द्रीय समिति बैठककै निर्णय खोजेका कारण फेरि विवरणसमेटिएको निर्णय बुझाउन लागिएको माओवादी स्थायी समिति सदस्य दीनानाथ शर्माले बताए ।
माओवादी केन्द्र र एमालेबीच एकता भएर नेकपा बनेपनि सर्वोच्च अदालतको गत फागुन २३ गतेको निर्णयले पूर्ववत पार्टी स्थापना गरेपछि दुवै पार्टीका सबै नेता र निर्वाचित जनप्रतिनिधिहरु आआफ्नै दलमा फर्किनुपथ्यों । तर, तत्कालिन गृहमन्त्री एवं पार्टीका सचिवालय सदस्य रामबहादुर थापा, टोपबहादुर रायमाझी सहितका केन्द्रीय नेताहरु एवं सांसदहरु र स्थानीय तहका केही जनप्रतिनिधिहरु एमालेमा प्रवेश गरेका थिए । तीमध्ये रामबहादु थापा, टोपबहादुर रायमाझी, लेखराज भट्ट, प्रभु साह, गौरी शंकर चौधर, चन्द्र बहादुर खड्काको सांसद पद यसअघि नै खारेज भैसकेको छ । यस्तै प्रदेशका केही सांसदहरुको समेत सांसद पद खारेज भैसकेको छ ।
तर स्थानीय तहका जनप्रतिनिधिहरुको भने अहिलेसम्म पदबहालमै रहेका छन् । निर्वाचन आयोगले दल त्याग गरेका नेता र जनप्रतिनिधिहरुमाथि पार्टीको आधिकारिक कमिटीले निर्णय गरेको माइन्यूट नपाएका कारण उनीहरुलाई अहिलेसम्म पनि माओवादी केन्द्रको लिस्टबाट हटाएको थिएन ।
माओवादी केन्द्रको केन्द्रीय समिति बैठकले आयोगलाई अब औपचारिक रुपमै उनीहरुलाई पार्टीले अनुशासनको कारवाही गरेर साधारण सदस्यसमेत नरहने गरी निस्काशनको जानकारी गराउने नेता शर्माले बताए । जसअनुसार स्थानीय तहका प्रमुख उपप्रमुख, वडा अध्यक्ष र सदस्य गरी १४ जनलाई निस्काशन गरेको जानकारी गराउन लागिएको छ ।
प्रतिक्रिया