अमेरिकाले इरानका कैयौं वेवसाइट र टेलिभिजन च्यानल बन्द गर्दिएको छ ।
नवनिर्वाचित इरानी राष्ट्रपति इब्राहिम रइसीको सपथ ग्रहण अघि अमेरिकाले इरानी सरकार र समाचार संस्थाहरुका वेवसाइट र टेलिभिजन च्यानलहरु बन्द गरेको हो ।
मंगलबारदेखि नै कैयौं वेवसाइटहरु बन्द गरिएका छन् । इरानी सरकारको अंग्रेजी भाषाको प्रेस टेलिभिजन र वेवसाइट प्रेस टिभी डट कम बन्द गरिएको छ । प्रेसटिभी डट कम नेपालमा समेत खुल्न सकेको छैन । यसैगरी हुति आन्दोलन समर्थित अल मसिराह टिभी पनि बन्द गरिएको छ ।
अमेरिकाको वाणिज्य विभाग र एफबीआईले ३० वटा इरानी वेवसाइट र समाचार संस्थाहरुमाथि कारवाही गरेको हो । यद्यपी कतिपय वेवसाइट बन्द गरिएको केही घण्टाभित्रै नयाँ डोमेनका साथ संचालनमा आएका छन् ।
इरानमा कट्टरपन्थी इब्राहिम रईसी राष्ट्रपतिमा निर्वाचित भएपछि अमेरिकाले पहिलो कारवाही गरेको हो । रईसीले आगामी महिना सपथ लिँदैछन् ।
अमेरिकाले इरानको परमाणु कार्यक्रम अघि बढ्न नदिन इरानमाथि लामो समयदेखि प्रतिबन्ध लगाउँदै आएको छ । तत्कालिन अमेरिकी राष्ट्रपति डोनाल्ड ट्रम्पले इरानसँग भएको ६ मुलुक सम्मिलित परमाणु सम्झौताबाट पछि हट्दै इरानमाथि कडा प्रतिबन्ध लगाएका थिए । त्यसपछि अमेरिकासँग झन सम्बन्ध बिग्रेको छ ।
प्रतिक्रिया