काठमाडौं । संघीय संसदको अधिवेशन साउन ३ गते बस्ने भएको छ ।
मन्त्रिपरिषद्को आज बसेको बैठकले साउन ३ गते अपरान्ह ४ बजे बस्ने गरी अधिवेशन आह्वन गर्न राष्ट्रपतिसमक्ष सिफारिस गरेको छ ।
बैठकपछि सरकारका प्रवक्ता एवं कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले संघीय संसदका दुवै सदन प्रतिनिधिसभा र राष्ट्रियसभाको अधिवेशन बोलाउन राष्ट्रपतिसमक्ष सिफारिसको निर्णय भएको बताए ।
सर्वोच्च अदालतले यही असार २८ गते प्रतिनिधिसभा विघटनसम्बन्धी मुद्दाको फैसला गर्दै साउन ३ गतेभित्र अधिवेशन आह्वान गर्न आदेश जारी गरेको थियो ।
अदालतको आदेशअनुसार सरकारले अधिवेशन बोलाउन राष्ट्रपतिलाई सिफारिस गरेको हो ।
यसअघि प्रतिनिधिसभाको चालु वर्षे अधिवेशनलाई निवर्तमान प्रधानमन्त्री केपी शर्मा ओलीले गत जेठ ८ गते मध्यरातमा भंग गरी मध्यावधि चुनाव घोषणा गर्न सिफारिस गरेअुनसार राष्ट्रपतिले भंग गरेकी थिइन । सो कार्य असंवैधानिक भएको सर्वोच्चले ठहर गरेको छ ।
सर्वोच्च अदालतले प्रतिनिधिसभा पुनर्स्थापना गर्ने फैसला गरेकै दिन असार २८ गते हतारहतार निवर्तमान प्रधानमन्त्री ओलीले राष्ट्रियसभाको बैठक अन्त्य गरेका थिए ।
यस्तै मन्त्रिपरिषद् बैठकले सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोग म्याद १ वर्ष थप गर्ने निर्णय गरेको छ ।
प्रतिक्रिया