काठमाडौं । नेकपा एमालेले प्रधानमन्त्री शेरबहादुर देउवालाई विश्वासको मत नदिने निर्णय गरेको छ । पार्टी प्रतिपक्षमा पुगेपछि पहिलो पटक बसेको स्थायी कमिटी बैठकले देउवालाई विश्वासको मत नदिने निर्णय गरेको हो ।
ललितपुरको च्यासलस्थित तुलसीलाल स्मृति प्रतिष्ठानमा बसेको बैठकले देउवालाई विश्वासको मत नदिने निर्णय गरेको प्रवक्ता प्रदीप ज्ञवालीले जानकारी दिए । बैठकले पार्टीको निर्णय अनिवार्य मान्न आफ्ना सबै सांसदहरुलाई निर्देशन दिएको छ । ज्ञवालीले भने, ‘अलोकतान्त्रिक एवं अस्वस्थ विधिबाट गठन सरकारलाई पार्टीको समर्थन नरहने र विश्वासको मत नदिने स्पष्ट पार्दै पार्टीका प्रतिनिधिसभा सदस्यहरुलाई पार्टीको निर्णय मान्न निर्देशन दिएको छ ।’ बैठकले अब संसदमा रचनात्मक र सशक्त प्रतिपक्षको भूमिका निभाउने निर्णय गरेको छ ।
यसैगरी बैठकले पार्टीभित्रको विवाद मिलाउन गठित १० सदस्यीय कार्यदल विघटन गरेको छ । एमालेमा चलिरहेको विवाद समाधानका लागि गत जेठ २ मा गठित कार्यदलले असार २७ गते तयार पारेको १० बुँदे प्रस्तावलाई अनुमोदन गरेर कार्यदल विघटन गरिएको एमाले प्रवक्ता ज्ञवालीले जानकारी दिए ।
बैठकमा ओली पक्षका सदस्यहरुको मात्र उपस्थिति रहेको थियो । बैठक अघि कार्यदलमा नेपाल पक्षका सदस्यहरु बैठक रोक्ने अनुरोध गर्न अध्यक्ष ओलीलाई भेट्न पुगेका थिए । ओलीले बैठक रोक्न अस्विकार गरेपछि उनीहरु बैठकमा सहभागी नभई फर्केका थिए ।
प्रतिक्रिया