नेपाल पक्षको मत बिना देउवाले विश्वासको मत प्राप्त गर्ने सम्भावना बढ्यो, जसपा महन्थ पक्ष पनि देउवालाई मत दिँदै

काठमाडौं । देउवा सरकारलाई विश्वासको मत लिने पर्याप्त समय रहेपनि प्रधानमन्त्री शेरबहादुर देउवाले पुनःस्थापित प्रतिनिधिसभाको पहिलो बैठकमै विश्वासको मत लिएर प्रतिनिधिसभाको पुरा आयु प्रधानमन्त्री बन्ने मार्ग सहज बनाउने प्रयास थालेका छन् ।

प्रतिनिधिसभाको हाल रहेको २७१ संख्या अनुसार विश्वासको मत प्राप्त गर्न १३६ सांसदको आवश्यकता छ । प्रतिनिधिसभाको पछिल्लो अँकगणित अनुसार जनता समाजवादी पार्टीले पनि देउवालाई विश्वासको मत दिने निर्णय सार्वजानिक भएसँगै एमाले नेपाल पक्षको मत बिना देउवाको मत पुग्ने अवस्था देखिएको छ । यद्देपी प्रधानमन्त्री देउवालाई विश्वासतको मत दिने विषयमा नेपाल पक्षले निर्णय गरिसकेको बताईएको छ । नेपाल पक्षको कम्तीमा २० मत देउवाको पक्षमा पर्ने अनुमान गरिएको छ । वरिष्ठ नेता झलनाथ खनाल मुलुक बाहिर रहेको, उपाध्यक्ष भिम रावलले राजीनामा दिएको र कार्यदलका थप १ जनाले मतदानमा भाग नलिएपनि २० जनाको मत देउवाको पक्षमा आउनेमा काँग्रेस ढुक्क देखिएको छ ।

कांग्रेस र माओवादीसँग १ सय १० सांसद छन् । जसपाको ३२ जनाले देउवाको पक्षमा मतदान गर्दा सहजै देउवाले विश्वासको मत पाउने अवस्था देखिएको छ । जनमोर्चाको एक मत पनि देउवाको पक्षमा पर्ने निश्चित छ ।

कार्यब्यवस्था समितिबाट पारित भएर प्रतिनिधिसभाको आजै दुईवटा बैठक बोलाएर विश्वासको मतको छिनोपानो गर्ने तयारी शुरु भईसकेको छ । दुईपटक संसद विघटन गरेका एमाले अध्यक्ष केपी ओली संसदको पहिलो बैठकमा नपुगेपनि दोस्रो बैठकमा भने उपस्थित भएका छन् ।