काठमाडौं । नेकपा एमालेका अध्यक्ष केपी शर्मा ओलीले कम्युनिष्ट आन्दोलनका गद्दारहरुलाई पार्टीमा कुनै स्थान नभएको टिप्पणी गरेका छन् ।
केन्द्रीय कमिटी बैठकलाई सम्बोधन गर्दै अध्यक्ष ओलीले माधवकुमार नेपालसहितका केही नेता र सांसदहरुले पार्टी र कम्युनिष्ट आन्दोलनप्रति गद्दारी गरेको आरोप लगाए । उनले गद्दारहरुलाई पार्टीमा कुनै स्थान नभएको घोषणा गरे ।
सम्बोधनका क्रममा आक्रोशितमा मुद्रामा ओलीले भने, ‘अपराध गर्ने, सरकार ढाल्ने, अनि उनैलाई बहुमत दिनुपर्ने ? अध्यक्ष बनाउनुपर्ने ? एमालेमा अब उनलाई ठाउँ छैन ।’
उनले पार्टीप्रति गद्दारी गर्नेहरुलाई कारबाही नगर्ने हो भने एमाले पार्टी अब पार्टी नै नरहने बताए । ओलीले अन्य कोही साथीहरु गल्ती स्वीकार गरेर, सच्चिएर आए स्वागत गर्ने बताए । ओलीले फ्लोर क्रसको घटनालाई चरम अनैतिक भएको टिप्पणी गरे ।
ओलीको प्रस्ताव अनुसार २२ सांसदलाई पार्टी अनुशासन उल्लंघन गरेको अभियोगमा २४ घण्टे स्पष्टीकरण सोध्ने निर्णय केन्द्रीय कमिटी बैठकले गरेको छ ।
यस्तै बैठकले १० बुँदे सहमतिलाई कार्यान्वयनमा लैजाने निर्णय पनि गरेको छ । केन्द्रीय कमिटीको अर्को बैठक मंगलबार दिउँसो ३ बजे बस्ने भएको छ ।
प्रतिक्रिया