काठमाडौं । नेकपा एमालेका अध्यक्ष केपी शर्मा ओलीले माधवकुमार नेपालहरूलाई आम माफी दिने घोषणा गरेका छन् ।
बिहीबार पुष्पलाल स्मृति प्रतिष्ठानले ललितपुरमा आयोजना गरेको कार्यक्रममा अध्यक्ष ओलीले पार्टीमा बाटो बिराएकाहरुलाई आममाफी दिने घोषणा गरेका हुन् ।
ओलीले भने, ‘ बाटो बिराएका भडि्कएका साथीहरुलाई पनि आग्रह गर्न चाहन्छु, यस पार्टी र आन्दोलनको एकताका लागि पुष्पलाललाई सम्झिएर भन्न चाहन्छु, सबैलाई एम्नेष्टी इज ग्रान्टेड ।’
ओलीले पहिला जे भए पनि अब मिलेर काम गर्न प्रस्ताव गरे । उनले भने, ‘जे सुकै भएको होस्, एम्नेष्टी । आउनुस् मिलेर काम गरौं ।’
अध्यक्ष ओलीले कसैले औँला ताक्दैमा एमाले नसिद्धिने दाबी गरे। एमाले औंला ताक्ने वित्तिकै कुहिने काँक्राको कलिलो चिचिलो नभएको उनले जिकिर गरे । उनले भने, ‘पुष्पलालजस्ता आदर्श व्यक्ति, मदन भण्डारीजस्ता आदर्श व्यक्तित्वबाट प्रशिक्षित विचार र आन्दोलन हो । यो स्वार्थहरुको गठबन्धन होइन । समृद्ध नेपाल र सुखी नेपालीको गहन अभिभारा बोकेको र अगाडिका चुनौती सामना गर्ने हिम्मत भएको आन्दोलन हो ।’
प्रतिक्रिया