काठमाडौं । नेकपा एमालेले वरिष्ठ नेता माधवकुमार नेपालसहित १४ सांसदलाई पदमुक्त गरेको छ ।
एमालेले नेपालसहित १४ सांसदलाई पदमुक्त गर्न संसद सचिवालयमा पत्र पठाएको छ । यस्तै निर्वाचन आयोगमा पनि एमालेले ती सांसदहरुलाई पदमुक्त गरेको पत्र बुझाएको छ ।
सरकारले राजनीतिक दल विभाजनसम्बन्धी अध्यादेश ल्याएकै दिनमा एमालेले वरिष्ठ नेता नेपालसहित उनीपक्षीय सांसदहरुलाई पदमुक्त गर्न पत्राचार गरेको हो । पार्टीको निर्देशन र अनुशासन उल्लंघन गरेको भन्दै एमालेले उनीहरुलाई सांसद पदबाट हटाउन सचिवालयलाई पत्राचार गरेको हो ।
पदमुक्त गरिएका सांसदहरुमा नेपालसहित जीवनराम श्रेष्ठ, मुकुन्द न्यौपाने, मेटमणि चौधरी, विरोध खतिवडा, कल्याणी खड्का, रामकुमारी झाँक्री, लक्ष्मीकुमारी चौधरी, निरादेवी जैरु, पुष्पाकुमारी कर्ण, सरला यादव, कलिला खातुन, कृष्णलाल महर्जन र भवानी खापुङ रहेका छन्।
सरकारले आजै मात्र पार्टी केन्द्रीय कमिटी वा संसदीय दलको २० प्रतिशत पुर्याएर दल विभाजन गर्न सक्ने गरी राजनीतिक दलम्बन्धी अध्यादेश ल्याएको छ । अध्यादेश आफ्नो पार्टी फुटाउन ल्याएको भन्दै एमालेले आपत्ति जनाएको छ ।
प्रतिक्रिया