काठमाडौं । नेकपा एमालेले नव गठित नेकपा (एकीकृत समाजवादी) का १४ केन्द्रीय सदस्यहरुलाई मान्यता नदिन निर्वाचन आयोगलाई पत्राचार गरेको छ । एमालेले प्रक्रिया पुरा गरेर कारवाही गरेका कारण दल दर्तामा उनीहरुको हस्ताक्षरलाई मान्यता नदिन आयोगलाई आग्रह गरेको हो । त्यस्तै विभाजनका लागि निर्वाचन आयोगमा नाम पेस भएका झलनाथ खनालसहित ७ जना नेताहरुले शुूमा पेश भएको निवेदनमा हस्ताक्षर नगरेका कारण उनीहरुको सनाखत नहुने भएको छ ।
एमाले विभाजनका लागि निर्वाचन आयोगमा नाम पेस भएका ५८ जनामध्ये ७ जनाले निवेदनमा हस्ताक्षर नगरेका कारण उनीहरुको सनाखत नहुने भएको हो ।
नेकपा (एकीकृत समाजवादी) दर्ताका लागि निर्वाचन आयोगमा कायम रहेको एमालेको २०३ सदस्यीय केन्द्रीय कमिटीका ५८ जनाको नाम पेस भएको छ । तीमध्ये झलनाथ खनाल, प्रदीप नेपाल, खगेन्द्र चुँडाल, रविन कोइराला, धर्मनाथप्रसाद साह, रत्नेश्वर गोइत र रविन्द्र बैठाले निवेदनमा हस्ताक्षर गरेका छैनन् भने हरि पराजुली र केदार न्यौपानेको नाम अन्तिममा हातले थपिएको छ । दल विभाजनकै पक्षमा देखिएपनि निवेदनमा हस्ताक्षर नभएका कारण विभाजनको गणनामा उनीहरुले मान्यता नपाउने भएको आयोगले जनाएको छ । निवेदनमा हस्ताक्षर भएकाहरुलाई मात्र सनाखतका लागि बोलाईएको आयोगका सचिव सुरेश अधिकारीले बताए । आयोगले सनाखथका लागि साढे २ घण्टाको समय सिमा तोकेको छ ।
७ जनाको सनाखतबाट नाम हटेपछि साविक एमालेको २०३ सदस्यीय कमिटीका ५१ जनाकोमात्र सनाखत हुने बताइएको छ ।
एमाले निर्वाचन आयोगका प्रमुख अग्नि खरेलले आयोगमा पुगेर हस्ताक्षर नगरेकाको सनाखत नलिन र कारवाहीमा परेका १४ जनाको समेत हस्ताक्षरलाई मान्यता नदिन आग्रह गरेका थिए ।
प्रतिक्रिया