बुटवल । आईतबार बिहानबाट अवरुद्ध रहेको सिद्धार्थ राजमार्ग अन्तर्गत बुटवल पाल्पा खण्ड आज नखुल्ने भएको छ । अविरल बर्षाका कारण पहिरो खसेर आइतबार विहान देखी बिभिन्न स्थानमा अवरुद्ध भएको बुटवल पाल्पा सडक आज सुचारु हुन नसक्ने पाल्पा प्रहरीले जनाएको छ । निरन्तरको वर्षाका कारण सिद्धार्थ राजमार्गका दर्जन बढी स्थानमा पहिरो गएपछि विहानै देखि बुटवल पाल्पा सडक अवरुद्ध भएको थियो ।
बिहानै देखि खसेको पहिरोले अवरुद्ध रहेको धेरै स्थानका पहिरो हटाएपनि डुम्रे नजिकै झरेको पहिरो भने हटाउन नसकिएको जिल्ला प्रहरी कार्यालय पाल्पाका प्रवक्ता डीएसपी रामेश्वर त्वाँतीले बताए । सडक सुचारु गर्नका लागि २ वटा डोजर तयारी अवस्थामा राखेपनि लगातार लेदो सहितको पहिरो खस्ने क्रम नरोकिएका कारण सडक सुचारु गर्न नसकिएको प्रदेश ट्राफिक प्रहरी कार्यालय बुटवलका प्रवक्ता डीएसपी डिल्लीनारायण पाण्डेले बताए ।
राजमार्गको डुम्रेमा स्थानिय देवबहादुर सारुको २ तले पक्कि घर सहित बगाउँदा राजमार्ग अवरुद्ध भएको पाल्पाका प्रहरी प्रवक्ता डिएसपी त्वाँतीले बताए । ‘स्काईभेटर तयारी अवस्थामा राखेका छौं, चालकले तेल छैन भन्दैछ, हेरौं के हुन्छ ?’ डीएसपी त्वाँतीले भने । सडक खुल्ने सम्भावनाका विषयमा प्रश्न गर्दा उनले स्काईभेटरको चालकलाई सोध्न समेत आग्रह गरे ।
प्रतिक्रिया