हेटौंडा । बागमती प्रदेशका १२ प्रदेशसभा सांसदले नेकपा एमाले परित्याग गरेका छन् ।
राजेन्द्र पाण्डेसहितका १२ सांसदले एमाले दल त्याग गरेर नेकपा एकीकृत समाजवादीमा समाहित भएका छन् । नयाँ दल रोज्नेमा मुख्यमन्त्री अष्टलक्ष्मी शाक्यले मन्त्री बनाएका कृष्ण खनालसमेत रहेका छन् ।
सरकारले हालै जारी गरेको राजनीतिक दलसम्बन्धी अध्यादेशअनुसार प्रदेश र स्थानीय तहका जनप्रतिनिधिले २१दिनभित्र दल रोज्न पाउने प्रावधान रहेको थियो । निर्वाचन आयोगले अध्यादेशअनुसार राजनीतिक दलसम्बन्धी नियमावली संशोधन गर्दै भदौ १५ गतेदेखि २२ गतेसम्म दल रोज्न पाउने सूचना जारी गरेको थियषे ।
एमालेका ११ सांसदले आज हेटौंडामा रहेको बागमती प्रदेश निर्वाचन आयोगको कार्यालयमा पुगेर एकीकृत समाजवादी रोजेको सनाखत गराएका छन् । सांसदहरु राजेन्द्र पाण्डे, कृष्ण खनाल, माधव पौडेल, मुनु सिग्देल, लक्ष्मण लम्साल, बसुन्धरा हुमागाईं, पार्वती सिलवाल, राजेन्द्रमान श्रेष्ठ, इन्द्रमाया गुरुङ, बसन्त मानन्धर, कुसुमकुमार कार्की र रमा आले मगरले एस पार्टी रोजेका हुन्।
एमालेमा छँदा माधवकुमार नेपालको पक्षमा हालका मुख्यमन्त्री अष्टलक्ष्मी शाक्यसहित २२ जना सांसद रहेका थिए । शाक्यले मुख्यमन्त्री नेता नेपालको साथ छोड्दै पार्टीको संस्थापन पक्षमा विलय भएकी थिइन । त्यसपछि डोरमणि पौडेलले मुख्यमन्त्रीबाट राजीनामा दिलाएर एमालेले शाक्यलाई मुख्यमन्त्री बनाएको थियो ।
१२ जना सांसदले एस पार्टी रोजेपछि शाक्य नेतृत्वको एमाले सरकार अल्पमतमा परेको छ । एकल बहुमतप्राप्त सरकारको दल विभाजन भएमा मुख्यमन्त्रीले एकमहिनाभित्र संसदमा विश्वासको मत लिनुपर्ने संवैधानिक प्रावधान रहेको छ । एसपार्टीमा २२ गतेसम्म २१ जना सांसदले सनाखत गर्ने सो पार्टीका नेताहरुले दाबी गरेका छन् ।
*पहिला ११ सांसदले दल रोजेको भनिएकोमा मन्त्री कृष्ण खनालले समेत आजै दल रोजेका कारण शीर्षकसहित समाचार अपडेट गरेका छौं -सं.
प्रतिक्रिया