धनगढी । सुदूरपश्चिम प्रदेशमा नेकपा एमालेका १३ जना प्रदेशसभा सांसदले एमाले दल परित्याग गरी नेकपा एकीकृत समाजवादीमा सामेल भएका छन् ।
सभामुखसहित २५ जना सांसद रहेको प्रदेशसभामा एमालेमा छँदा माधवकुमार नेपालको पक्षमा १८ जना सांसद रहेका थिए । ती मध्ये १३ जना सांसदले एकीकृत समाजवादी दल रोज्ने निर्णय गरेका हुन् ।
आज पूर्णा जोशी, कुलवीर चौधरी, सुशील बुढाथोकी, लाल बहादुर खड्का, माया भट्ट, चुन कुमारी चौधरी, अमर साउद, मना साउद, दुर्गा विक र बलबहादुर सोडारीको सनाखत भएको छ । अन्य सांसदको कागजात नपुग्दा आज सनाखत हुन बाँकी रह्यो ।
सांसदहरुले उनीहरुले निर्वाचन आयोगको प्रदेश कार्यालयामा पुगेर एस पार्टी रोजेको सनाखत गरेका छन् ।
दीर्घ सोडारीसहित तारा लामा तामाङ, बलबहादुर सोडारी, पूर्णा जोशी, दुर्गा कामी, माया भट्ट, लालबहादुर खड्का, अमरबहादुर साउद, अर्चना गहतराज, चुनकुमारी चौधरी, मना साउद, कुलवीर चौधरी र सुशीला बुढाथोकीले सनाखत निर्वाचन आयोग कार्यालय पुगेका थिए ।
एमाले उपाध्यक्ष एवं सुदुरपश्चिम प्रदेशका प्रभावशाली नेता भीम रावलले माधवकुमार नेपालसँगको संगत परित्याग गरी अध्यक्ष केपी शर्मा ओली पक्षमा विलय भएपनि उनले प्रदेशबाट धेरै सांसदहरुलाई जोगाउन सकेनन् ।
सांसद सोडारीले २२ गतेसम्म थप सांसदहरु एकीकृत समाजवादीमा सनाखत गर्ने दाबी गरेका छन् ।
यसअघि एमालेको संस्थापन पक्षमा ६ जना मात्र सांसद रहेकोमा अब नेपालको पक्षमा नगएका केही सांसद थपिने भएका छन् ।
प्रतिक्रिया