काठमाडौं । नेकपा एमालेको विरोधका बीच राष्ट्रियसभामा राजनीतिक दल सम्बन्धी अध्यादेश पेश भएको छ ।
राष्ट्रियसभाको आजको बैठकमा गृहमन्त्री बालकृष्ण खाँणले अध्यादेश पेश गरेका छन् ।
बैठक सुरु हुने वित्तिकै एमाले सांसदहरुले आआफ्नो स्थानबाट उठेर विरोध जनाएका थिए । विरोधकै बीच अध्यक्ष गणेशप्रसाद तिमिल्सिनाले गृहमन्त्री खाँणलाई अध्यादेश पेश गर्न अनुमति दिएका थिए । त्यसलगत्तै मन्त्री खाँडले अध्यादेश पेश गरेका थिए ।
दलसम्बन्धी अध्यादेश पेशभएपछि भने एमाले सांसदहरु आआफ्नो आसनमा बसेका थिए । त्यसपछि दिवंगत सांसदहरु जेबी टुहुरे र महेन्द्र शेरचनको निधनमा राष्ट्रिय सभाले शोक प्रस्ताव पारित गरेको थियो ।
राष्ट्रियसभाको अर्को बैठक भदौ २८ गते दिउँसो १ बजे बस्ने भएको छ ।
बुधबार बसेको राष्ट्रियसभाको पहिलो दिनको बैठकमा भने एमाले सांसदहरुले बैठक निरन्तर अवरुद्ध बनाएका थिए ।
प्रतिक्रिया