बालुवाटारमा सत्तारुढ गठबन्धनको बैठक, मन्त्रिपरिषद् विस्तारको गाँठो फुकाउने प्रयत्न

खबर कुरा
२७ भाद्र २०७८, आईतवार
                 

काठमाडौं । सत्तारूढ गठबन्धनको बैठक बसिरहेको छ ।

प्रधानमन्त्री निवास बालुवाटारमा बासिरहेको गठबन्धनमा आवद्ध दलहरूको बैठकमा मन्त्रिपरिषद् विस्तार, संसद भित्रको अवस्थाबारे छलफल भैरहेको छ ।

बैठकमा नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी र राष्ट्रिय जनमोर्चाका प्रतिनिधिहरू सहभागी छन्।

शेरबहादुर देउवाको नेतृत्वमा सरकार बनेको दुई महिना वित्नै लाग्दा पनि मन्त्रिपरिषद् विस्तार हुन सकेको छैन । दलहरु कसरी मन्त्रिपरिषद् विस्तार गर्ने भन्ने अन्यौल चिर्न सकेका छैनन् । हरेक पटकका बैठकमा यथाशीघ्र मन्त्रिपरिषद् विस्तार गर्ने भन्नेबारेमा छलफल र सहमति भए पनि गाँठो फुक्न सकेको छैन ।

राजनीतिक दल विभाजनसम्बन्धी अध्यादेशमाथि गठबन्धनकै एकीकृत समाजवादी र जसपाबीच विवाद रहेको छ । जसपा अध्यादेश फिर्ता गर्नुपर्ने अडानमा रहेको छ भने एकीकृत समाजवादी प्रतिस्थापन विधयेक ल्याउनुपर्ने मागमा छ । जसपालाई यही अध्यादेशको आडमा मन्त्री बन्न नपाउने सांसदहरुले पार्टी फोड्लान कि भन्ने भय छ । एकीकृत समाजवादीलाई भने अध्यादेशले वैधानिकता नपाउँदा नवगठित आफ्नो पार्टी नै संकटमा पर्ने हो कि भन्ने चिन्ता छ । कांग्रेस र माओवादी केन्द्रभित्र मन्त्री बन्नका लागि नेताहरुले नेतृत्वलाई दबाब दिन छोडेका छैनन् । आआफ्नो दुखका बीच मन्त्रिपरिषद् विस्तार गर्न दलहरुले गाँठो फुकाउन नसकेका हुन् ।

अर्कोतिर, प्रमुख प्रतिपक्षी दल नेकपा एमालेले संसद अवरोध गरिरहेको छ । आफ्नो पार्टी फुटाउन मतियार बनेको आरोप लगाउँदै एमाले सभामुख विरुद्ध रोष्टम घेराउ गर्दै नारावाजी गरिरहँदा सरकारले नारावाजी र अवरोधकै बीच राजनीतिक दल विभाजनसम्बन्धी अध्यादेश र नयाँ बजेट पेश गरिसकेको छ । यसबाट एमाले सरकार र सभामुख विरुद्ध थप आगो भएको छ । प्रतिनिधिसभाको बैठक आजै दिउँसो १ बजे बस्दैछ ।

गठबन्धनको बैठकमा यी समसामयिक विषयमा छलफल भैरहेको छ ।

 

 

यसमा तपाइको मत

Your email address will not be published. Required fields are marked *


*