काठमाडौं । सत्तारुढ गठबन्धनका दलहरुले आज पनि मन्त्रिपरिषद् विस्तारबारे निर्णय गर्न सकेनन् ।
प्रधानमन्त्री निवास बालुवाटारमा सत्तारुढ गठबन्धनमा आवद्ध पाँच दलको बैठक बसेपनि मन्त्रिपरिषद् विस्तारमा ठोस सहमति जुटाउन नसकेका हुन् ।
बैठकमा नेताहरुबीच यसबारे छलफल भए पनि ठोस सहमति नजुटेका कारण एकदुई दिनमा फेरि छलफल गरेर टुंग्याउने गरी सहमति भएको छ । बैठकमा सबै विषयमा कुराकानी भए पनि निर्णयमा पुग्न बाँकी रहेको कांग्रेस महामन्त्री पूर्णबहादुर खड्काले बताए ।
गठबन्धन दलहरुको तर्फबाट कांग्रेस सभापति शेरबहादुर देउवा गत असार २९ गते प्रधानमन्त्रीमा नियुक्त भएका थिए । सोही दिन कांग्रेस र माओवादी केन्द्रबाट दुई दुई जना मन्त्रीसहित पाँचसदस्यीय मन्त्रिपरिषद् गठन भएको थियो । तर त्यसपछि आजसम्म पनि मन्त्रिपरिषद्लाई पूर्णता दिन नसक्दा आलोचना बढिरहेको छ । यद्यपी, दलहरुले भने सहमति जुटाउन सकेका छैनन् । यसअघि शुक्रबार बसेको गठबन्धनका शीर्ष नेताहरुको बैठकमा प्रधानमन्त्री देउवाले मन्त्रीको नाम दिन भनेका थिए ।
बैठकमा मन्त्रिपरिषद् विस्तार लगायत संसद्मा जारी अवरोध कसरी हटाउने भन्नेबारेमा पनि छलफल भएको छ । प्रमुख प्रतिपक्षी दल नेकपा एमालेले सभामुखको भूमिकाप्रति असन्तुष्टि जनाउँदै संसदको चालु अधिवेशन सुरुदेखि अवरुद्ध गर्दै आएको छ ।
प्रतिक्रिया