काठमाडौं । नेकपा एमालेका अध्यक्ष केपी शर्मा ओलीले दायर गरेको रिट हेर्न नभ्याइने सूचीमा परेको छ ।
सभामुख अग्निप्रसाद सापकोटा, निर्वाचन आयोग र नेकपा एकीकृत समाजवादी विरुद्ध दायर रिटमाथि सर्वोच्च अदालतका न्यायाधीसद्वय दीपककुमार कार्की र मीरा खड्काको इजलासमा हुनेभनिएकोमा हेर्न नभ्याइने सूचीमा परेको हो । अब अर्को दिनका लागि पेशी तोकिनेभएको छ ।
पार्टीले कारवाही गरेको १४ जना सांसदलाई पदमुक्त नगरेको भन्दै अध्यक्ष ओलीले वारेसमार्फत सभामुख सापकोटासहित निर्वाचन आयोग र एकीकृत समाजवादी विरुद्ध मुद्दा दायर गरेका थिए । रिटमा ओलीले सभामुखले गैरकानूनी काम गरेको आरोप लगाएका थिए ।
रिटमा अन्तरिम आदेश दिने कि नदिने भन्नेबारे आज सुनुवाइ हुन लागेको थियो ।
ओलीको पक्षमा अन्तरिम आदेश जारी भएमा माधव नेपालसहितका सांसदको पद गुम्नेछ भने अन्तरिम आदेश जारी नभएमा एमालेले संसदमा गर्दै आएको अवरोध औचित्यहीन बन्नेछ ।
एमालेका तत्कालिन वरिष्ठ नेता माधवकुमार नेपालसहित १४ जना सांसदसमेतले नयाँ दल नेकपा एकीकृत समाजवादी दर्ता गरेका छन् । निर्वाचन आयोगले दल दर्ता गरिसकेको छ ।
सभामुख सापकोटाले आफ्नो पार्टी फुटाउने मतियार बनेको आरोप लगाउँदै एमालेले संसदको चालु अधिवेशन निरन्तर अवरुद्ध गर्दै आएको छ । सभामुख सापकोटाले भने अदालतमा विचाराधीन मुद्दामाथि संसदमा बहस गर्न नसकिने बताउँदै आएका छन् ।
प्रतिक्रिया