नेपालगन्ज । बाँकेमा पहिलो पटक बाघले मान्छे खाएको छ । बाँके राष्ट्रिय निकुञ्जमा रहेको पाटे बाघले राप्तीसोनारी गाउँपालिका वडा नं. १, पूर्वी गाभरमा रहेको एक होटलमा काम गर्ने भारतीय नागरिकलाई मारेर खाएको हो ।
स्थानीय भेरी राप्ती स्टाफ होटलमा काम गर्दै आएका अन्दाजी ४५ वर्षका भारतीय नागरिकलाई बाघले खाएको बाँके निकुञ्जका वार्डेन श्यामकुमार शाहले जानकारी दिएका छन् ।
मानसिक अवस्ता केही सुस्त रहेका भारतीय मूलका ती व्यक्ति आईतबार साँझदेखि हराइरहेका थिए । उनको शव विहान साढे सात बजे निकुञ्जभित्र भेटिएको वार्डेन शाहले बताए । पूर्वपश्चिम राजमार्गदेखि ५ सय मिटर उत्तरमा निकुञ्ज भित्र ती ब्यक्तिको बाघले खाएर बचेको एउटा खुट्टामात्रै भेटिएको उनले जानकारी दिए ।
बाघले खाएको ती ब्यक्तिको सनाखत हुन नसकेको बताईएको छ। होटल सञ्चालकहरुले भैया भनेर बोलाउने गरेपनि मृतक भारत कुन स्थानको र वास्तविक नाम थर पत्ता नलागेको वार्डेन शाहले बताए ।
निकुञ्जले केही दिनदेखि त्यस क्षेत्रमा बाघ देखिएकाले सतर्क रहन स्थानीय जानकारी गराइरएको बताएका छन् । बाँके निकुञ्जका अनुसार राष्ट्रिय निकुञ्ज क्षेत्रमा २१ वटा पाटेबाघ रहेका छन् । गाभर क्षेत्रमा दुई दिनअघि मात्रै गाउँमै पसेर बाघले दुई वटा बाख्रा र एउटा बाच्छो मारेको स्थानीयले बताएका छन् ।
यसअघि बर्दियामा पटक पटक बाघले मान्छे खाएको खबर आउने गरेपनि बाँकेमा मान्छेमाथि बाघले आक्रमण गरेको पहिलो घटना हो ।
प्रतिक्रिया