माओवादी केन्द्रको स्थायी समिति बैठक बस्दै

काठमाडौं । नेकपा माओवादी केन्द्रको स्थायी समिति बैठक आज बस्दैछ।

अध्यक्ष पुष्पकमल दाहाल प्रचण्डले मंगलबार दिउँसो ३ बजे पार्टी कार्यालय पेरिसडाँडामा बस्नेगरी बैठक बोलाएका हुन् ।

सत्ता गठबन्धनको एक मुख्य दल माओवादी केन्द्रले मन्त्रिपरिषद् विस्तारमा भैरहेको ढिलाई र संसदभित्रको अवरोधका विषयमा छलफल गर्न बैठक बोलाइएको हो ।

प्रधानमन्त्री देउवाले सहयात्री दलहरुलाई मन्त्रीको नाम दिन आग्रह गरिरहेका छन् । तर, अझै पनि दलहरुबीच मन्त्रिपरिषद् विस्तारमा ठोस सहमति भैसकेको छैन । माओवादी केन्द्रभित्र मन्त्री बन्नका लागि प्रायः सबै नेताहरुले अध्यक्ष प्रचण्डलाई दबाब दिइरहेका छन् । मन्त्री छान्ने काम माओवादीका लागि समेत सजिलो छैन ।

यस्तै, सदनमा प्रमुख प्रतिपक्षी दल नेकपा एमालेले निरन्तर अवरोध सिर्जना गरिरहेको छ । सभामुख अग्निप्रसाद सापकोटाले आफ्नो पार्टी फुटाउन मतियार बनेको भन्दै एमालेले उनको राजीनामा समेत माग्न थालेको छ ।

माओवादी स्थायी समिति बैठकमा यी लगायत सबै विषयमा छलफल गर्न लागिएको छ ।