बँदेल नियन्त्रणका लागि थापिएको विद्युतिय धरापमा परि बर्दियामा एकाघरका ३ जनाको ज्यान गयो

खबर कुरा
२ आश्विन २०७८, शनिबार
                 

बर्दिया । जंगली बँदेललाई धपाउन थापेको विद्युतीय पासोमा परी बर्दियामा ३ जनाको ज्यान गएको छ । ठाकुरबाबा नगरपालिका ३ गोदाना गाउँमा एकै घरका तीनजनाको विद्युतिय धरापमा परि मृत्यु भएको हो ।

शुक्रबार राति स्थानीय राजबहादुर शाहीको खेतमा पानी हेर्न गएका बेला शाहीले बँदेल धपाउन धान खेतमा लगाएको विद्युतीय धरापमा परि ३५ वर्षीय बालकृष्ण थारू, उनकी श्रीमती ३० वर्षीया सुनिता र बालकृष्णकी भाउजु ४५ वर्षीया बेलमतीको मृत्यु भएको बर्दिया प्रहरीले जनाएको छ ।

धानखेतमा करेन्ट प्रवाह गरेको आरोपमा स्थानीय ८२ वर्षीय राजबहादुर शाहीलाई प्रहरीले नियन्त्रणमा लिएको छ । घटनाबारे थप अनुसन्धान भइरहेको जिल्ला प्रहरी कार्यालय बर्दियाका प्रहरी प्रमुख प्रहरी उपरिक्षक इश्वर कार्कीले बताए ।

बर्दिया निकुञ्जबाट निस्कने बंदेलले ठुलो अनुपातमा धानबाली नष्ट गर्न थालेपछि लामो समयदेखि बर्दिया र यस आसपासका क्षेत्रमा बंदेलबाट धानबाली जोगाउन विद्युतिय धराप थाप्ने गरिन्छ । यस अघि पनि विद्युतिय धरापमा परि दुईवटा जंगली हात्ती र एक जना युवाको ज्यान गएको थियो ।

यसमा तपाइको मत

Your email address will not be published. Required fields are marked *


*