लुम्बिनी प्रदेशसभामा आज नयाँ बजेट प्रस्तुत हुँदै, प्रतिपक्ष एमालेको अवरोध कायम रहने

खबर कुरा
२० आश्विन २०७८, बुधबार
                 

बुटवल । लुम्बिनी प्रदेशसभामा प्रदेश सरकारको तर्फबाट आज प्रतिस्थापन विधेयकमार्फत् नयाँ बजेट प्रस्तुत गरिने भएको छ। आज मध्यान्ह १ बजे बस्ने प्रदेशसभाको बैठकमा आर्थिक मामिला तथा सहकारी मन्त्री कृष्णध्वज खड्काले विधेयक पेस गर्ने भएका हुन् ।

पूर्ववर्ती शंकर पोखरेल नेतृत्वको सरकारले अध्यादेश मार्फत ल्याएको बजेटमा संशोधन गरि बजेटको तयारी गरिएको आर्थिक मामिला मन्त्री खड्काले बताए । पूर्ववर्ती सरकारका आर्थिक मामिला मन्त्री बैजनाथ चौधरीले प्रस्तुत गरेको अध्यादेशको बजेटमा प्रतिपक्ष गठबन्धनमा देखिएको असहमतिका बुँदाहरुलाई नयाँ बजेटमा समावेश गरिएको उनले बताए ।

नेकपा एमालेका नेता शंकर पोखरेलको पूर्ववर्ती सरकारले चालु आर्थिक वर्ष २०७८/७९ का लागि गएको असार १ गते अध्यादेश मार्फत ४० अर्ब ९५ करोड ९७ लाख रुपैयाँको बजेट ल्याएको थियो । संसदमा बजेट प्रस्तुत गर्ने कार्यसूची तष्यार भईसकेपछि संसदबाट बजेट पास गर्न बहुमत नहुने देखिएपछि एमाले सांसदहरु संसद नै छाडेर निस्केको थियो । संसद बिहस्कार गरेको सत्तारुढ दलका तत्कालीन मुख्यमन्त्री पोखरेलले अध्यादेशमार्फत् बजेट ल्याएका थिए ।

सरकारले नयाँ बजेट पेस गर्ने तयारी गरिरहेका बेला सत्ताबाट प्रतिपक्षमा पुगेको एमाले भने आज पनि सदन अवरुद्ध गर्ने तयारीमा देखिएको छ । सरकारबाट बहिर्गमन भएदेखि नै एमालेले संसद अवरुद्ध गर्दै आएको छ । सूर्यचिन्हबाट चुनाब जितेका सांसदद्वय अजय शाही र बिमला वलीलाई कारवाही नहुँदासम्म सदन चल्न नदिने अडानमा रहेको एमालेले लगातार संसदमा अवरोध गर्दै आएको छ ।

सत्तारुढ गठबन्धन भने गणीतिय हिसावले संसदमा बहुमत रहेको आधारमा अवरोधकैबीच बजेट पास गर्ने रणनितीमा देखिएको छ । माओवादी केन्द्रका प्रमुख सचेतक तुलाराम घर्तीले सदनमा बहुमत पुग्ने भएकाले बजेट पास हुने दाबी गरे।

यसमा तपाइको मत

Your email address will not be published. Required fields are marked *


*