काठमाडौं ।नेकपा एमाले परित्याग गरि एकिकृत समाजवादीमा प्रवेश गरेका एमाले केन्द्रीय सदस्य भानुभक्त जोशीलाई नेकपा एकीकृत समाजवादीको स्थायी कमिटीमा राखिने भएको छ । बिहीबार जोशीलाई एकिकृत समाजवादी पार्टीका अध्यक्ष माधव कुमार नेपालले पार्टी प्रवेश गराउँदै जोशीलाई स्थायी कमिटीमा राखिने घोषणा गरेका हुन् ।
एकिकृत समाजवादी पार्टीमा प्रवेश गर्नुअघि जोशीले असोज २० गते एमालेबाट राजीनामा दिएका थिए । उनले आफ्नो राजीनामा पत्रमा एमाले एकताका लागि गरिएको १० बुँदे सहमति र अन्तरपार्टी निर्देशन (अपानी) कार्यन्वयन नगरेको भन्दै एमाले अध्यक्ष केपी ओलीप्रति असन्तुष्टि जनाएका छन् ।
उनले राजीनामामा पार्टीमा फेरि पनि आग्रह, पूर्वाग्रहको अवस्था यथावत नै रहेको भन्दै एमाले केन्द्रीय कमिटी सदस्य पदबाट राजीनामा दिएको उल्लेख गरेका छन् ।
जोशीको पार्टी प्रवेश कार्यक्रममा बोल्दै अध्यक्ष नेपाललेकेपी ओली र एमाले कम्युनिस्ट आदर्शबाट च्युत भइसकेको, राष्ट्रियताको मामिलामा आत्मसपर्णवादको नीति लिएको बताएका छन् । उनले जोशीलाई पार्टीमा स्थायी कमिटी सदस्य बनाउने समेत घोषणा गरे ।
पूर्व वनमन्त्रीसमेत रहेका जोशी बझाङ क्षेत्र नं १ बाट २०५१ सालमा प्रतिनिधि सभा सदस्य र २०६४ सालमा सोही क्षेत्रबाट संविधानसभा सदस्य रहेका थिए ।
प्रतिक्रिया