१२ देखि १८ वर्ष उमेर समुहलाई लगाउन १ लाख डोज फाइजर खोप नेपाल आइपुग्यो

काठमाडौं । अमेरिकाद्वारा नेपाललाई अनुदानमा उपलब्ध गराइएको १ लाख डोज फाइजर खोप नेपाल आइपुगेको छ ।

कोभ्याक्स सुविधाअन्तर्गत अमेरिकाले नेपाललाई १ लाख ६ सय २० डोज खोप दिएको हो । सोमबार बिहान त्रिभुवन अन्तराष्ट्रिय विमानस्थलमा खोप आइपुगेको हो ।

नेपाल ल्याइएको यो फाइजर खोप १२ देखि १८ वर्ष उमेर समुहलाई लगाउन मिल्ने छ ।

१२ देखि १८ वर्ष उमेरका दीर्घरोगी किशोर–किशोरीलाई खोप लगाइने स्वास्थ्य मन्त्रालयका प्रवक्ता एवं इपिडिमियोलोजी तथा रोग नियन्त्रण महाशाखाका निर्देशक डा. कृष्णप्रसाद पौडेलले बताएका छन् । खोप सीमित मात्रामा आएका कारण तत्काल सबैलाई लगाउन सक्ने अवस्था नरहेको पौडेलले बताए ।

यसअघि अमेरिकाले नेपाललाई जोन्सन एण्ड जोन्सन कम्पनीको १५ लाख डोज जानसेन खोप सहायता गरेको थियो । सो खोप एक डोज लगाएमात्र पुग्थ्यो ।