प्रधानन्यायाधीशले आज पनि घरबाटै गठन गरे आफूबाहेकका १० इजलास

काठमाडौं । प्रधानन्यायाधीश चोलेन्द्र शमशेर जबराले आज पनि आफूबाहेकका १० वटा इजलास गठन गरेका छन् । नेपाल बार एसोसिएसन र सहकर्मी न्यायाधीशहरूको विरोधका बीच जबराले आइतबारका लागि १० वटा इजलास गठन गरेका हुन् । अदालत परिषरमा आन्दोलन जारी रहेपछि शुक्रबार देखि जबराले घरबाटै इजलास गठन गर्न थालेका हुन् ।

नेपाल बारले सर्वोच्च प्रवेश गर्न नदिने भन्दै आज सर्वोच्चको दुबै गेटमा धर्ना शुरु गरेको छ । शुक्रबार मुल गेटमा धर्ना दिएका बारका कानुन व्यवसायीको आँखा छल्दै अर्को गेटबाट प्रधानन्यायाधीश आदालत प्रवेश गरेका थिए ।

उनले एउटा एकल र नौवटा संयुक्त इजलासका लागि २७२ मुद्दाको पेसी तोकेका छन् ।

नेपाल बारले शान्तिपूर्ण प्रर्दशनमा हस्तक्षेप गरेको भन्दै बहस बहिष्कार गर्ने निर्णय गरेको छ भने असन्तुष्ट न्यायाधीशहरूले भने बारले बहस बहिष्कार गरेको इजास नबस्ने बताएका छन् ।